स्याङ्जा ११ फागुन । स्याङ्जा जिल्ला क्रिकेट संघद्धारा आयोजित स्याङ्जा क्रिकेट लिगको उपाधी गल्याङ् नगरपालिकाले हात पारेको छ। योसंगै दोस्रो संस्करणको अन्तरपालिका स्तरीय पुरुष स्याङ्जा क्रिकेट लिगको उपाधि गल्याङले जितेको हो।
आँधीखोला गाउँपालिकालाई २४१ रनको फराकिलो अन्तरले पराजित गर्दै गल्याङ सर्वोत्कृष्ट बन्न सफल भएको हो। उपाधि बिजेता गल्याङले ४० हजार नगद सहित ट्रफी, मेडल, प्रमाण–पत्र र किटसेट पाएको छ। यसैगरी, उपबिजेता आँधीखोलाले २० हजार नगद सहित ट्रफी, मेडल, प्रमाण–पत्र र किटसेट पाएको हो।
पुतलीबजार नगरपालिका १३, मातृभूमि खेलमैदानमा भएको फाइनल प्रतियोगितामा टस जितेर पहिला ब्याटिङ गरेको गल्याङले निर्धारित ४० ओभरमा ८ विकेट गुमाएर ३१८ रन जोडेको थियो।तीन सय १९ रनको लक्ष्य पाएको आँधीखोलाले १६ दशमलब २ ओभरमा सबै विकेट गुमाउँदै ७७ रन बनायो।
प्रतियोगिताका उत्कृष्ट एवं बेस्ट बलर चापाकोट नगरपालिकाका करण पंगेनी, ब्याटर आँधीखोला गाउँपालिकाका ईश्वर क्षेत्री, किपर आँधीखोलाका पुर्णबहादुर जिटी, फिल्डर चापाकोटका विशाल कोइराला, इमर्जिङ प्लेयर अफ टुर्नामेन्ट भीरकोट नगरपालिकाका साइमन खाँण र प्लेयर अफ द टुर्नामेन्टमा आँधीखोलाका ईश्वर क्षेत्री भएका छन्।
माघ ३० देखि जारी प्रतियोगितामा जिल्लाभरका अधिकांश पालिकाको सहभागिता थियो। खेलाडीको क्षमता पहिचानगरि उनीहरुलाई प्रशिक्षित गराउने उद्देश्यले प्रतियोगिता गरिएको स्याङजा जिल्ला क्रिकेट संघका अध्यक्ष दिवाकर थापाले जानकारी दिनुभयो।
यसेैगरि, उपाधी विजेता गल्याङ्का खेलाडीका प्रोत्साहन स्वरुप जनही ५÷५ हजार नगद प्रदान गर्ने गल्याङ्का नगरप्रमुख गुरुप्रसाद भट्टराईले जानकारी दिनुभयो।