स्याङ्जा ५ भदौ । स्याङ्जाको सदरमुकाम पुतलीबजारमा रहेको प्रदेश अस्पतालले विस्तारित सेवा प्रदान गर्ने भएको छ । अस्पताल ब्यवस्थापन समितिको मंगलबार बसेको बैठकले उक्त निर्णय गरेको हो ।
सर्वसाधारण जनताको पहुँच सहज बनाउन, अस्पतालबाट गुणस्तरीय बिशेषज्ञ सेवा प्रदान गनर्, नयाँ तरिकाले अस्पताल संचालकको तयारीमा रहेको समितिका अध्यक्ष तथा जिल्ला समन्वय समितिका प्रमुख श्रीप्रसाद जीटीले बताउनुभयो । पचास शैयाको उक्त अस्पतालबाट अबदेखि १३ प्रकारको बिशेषज्ञ सेवा प्रदान गरिने छ । अस्पतालका प्रमुख डा. सुशील मरासिनीका अनुसार स्थायी र करार सेवाका १ सय कर्मचारीबाट सेवा प्रदान गरिदै आएकोमा ५० शैयाको अस्पताल भएससंगै १४१ बिशेषज्ञ चिकित्सक सहितको कर्मचारी दरबन्दी स्वीकृत भएको छ ।
भौगोलिक बनोटका हिसावले स्याङ्जाको सदरमुकाम स्याङ्जा बजार, प्रगतीनगर, बाडखोला, देवानचोक, पुतलीखेत, कुमालगाउँमा छरिएर रहेको छ । सेवाग्राहीले एकै स्थानबाट सेवा प्राप्त गर्न संभव छैन । अझ अस्पतालको सेवा लिन झन कठिन छ । किनकि प्रदेश अस्पताल पुतलीबजार ३ कुमालगाउँमा अवस्थित छ । सेवाग्राहीलाई सहज ढंगले सेवा प्रदान गर्न आन्तरिक श्रोतबाट ५० लाखमा विरामी ओसार्ने बिद्युतीय सवारी साधन खरिद गर्ने पनि समितिले निर्णय गरेको छ ।
समितिका सदस्य थमनारायण शर्माले दिएको जानकारी अनुसार उक्त गाडीले स्याङ्जा बजारबाट आधाआधा घण्टाको फरकमा छुट्नेगरी स्याङजा, प्रगतीनगर, मजुवा, बाडखोला, गोदगोदे हुदै अस्पताल पुरयाउने र अस्पतालबाट पुतलीखेत, नारायणस्थान, प्रगतीनगर, घुम्ति हुदै स्याङ्जासम्मका सर्वसाधारण सेवाग्राहीलाई नियमित सेवा प्रदान गर्नेछ ।
समितिले आन्तरिक श्रोतबाटै चिकित्सक सहितको फार्मेसी सेवा पनि स्याङ्जा बजारबाट दिने भएको छ । सामान्य स्वास्थ्य परीक्षण पश्चात बिरामीलाई थप उपचारका लागि प्रदेश अस्पताल सिफरिश गर्ने प्रवन्ध सहितको ब्यवस्था मिलाइएको छ । समितिमा समन्वय समितिका प्रमुख सहित पुतलीबजार नगरप्रमुख तुलसीराम रेग्मी, प्रजिअ इश्वरीप्रसाद अर्याल, प्रमुख कोष नियन्त्रक थमनारायण शर्मा, स्याङ्जा जिल्ला उद्योग वाणिज्य संघका अध्यक्ष महादेव श्रेष्ठ र मेडिकल सुपरिटेन्डेन्ट डा. सुशिल मरासिनी रहेका छन् ।
अस्पताललाई अझ सुब्यवस्थित तरिकाले संचालन गर्न, गुणस्तरीय बिशेषज्ञ सेवा प्रदान गर्न, सेवाग्राहीको मन जित्न र विशेष परिस्थिति बाहेक यहीबाट आवश्यक सेवा उपलब्ध गराउन के गर्न सकिन्छ ? त्यसका लागि मेसु डा. सुशिल मरासिनीले एक अवधारणा पत्र प्रस्तुत गर्नेछन । त्यसैका आधारमा अस्पतालले आफनो मार्गचित्र स्पष्ट पार्नेछ बैठकमा सहभागी प्रमुख कोष नियन्त्रक शर्माले बताए ।
अस्पतालले ओपीडी, इमर्जेन्सी, बिरामी भर्ना, जेष्ठ नागरिक, डेन्टल, आँखा, फिजियोथेरापी, भीडीयो एक्सरे, इसीजी, ल्याब जाँच, सुत्केरी, खोप, डायलायसिस, शल्यक्रिया, पोष्टमार्टम सेवा प्रदान गर्दै आएको छ । उपरोक्त सेवा प्रदान गर्न गत आवमा अस्पतालले ६ करोड, ५० लाख २९ हजार २७० रुपैया यथार्थ खर्च गरेको थियो ।
अस्पतालको सेवा संचालनका लागि संघीयतर्फ बित्तीय समानीकरण अनुदान, चालु र पूँजीगत खर्च वापतको बजेट र प्रदेश तथा स्थानीय सरकारबाट आवश्यकता बोध भए अनुसार उपलब्ध गराइएको स्रोतबाट खर्च गर्नेगरी सेवाग्राहीलाई सेवा प्रदान गरिदै आएको छ ।