स्याङ्जा २७ भदौ । स्याङ्जा जिल्ला अदालतले अत्यावश्यक बाहेकका सेवा अनिश्चितकालका लागि स्थगित भएको जनाएको छ । भदौ २६ गते सूचना जारी गर्दै अदालतले जेन—जी आन्दोलनका क्रममा सर्बोच्च अदालतमा सञ्चालित सरभर प्रणालीमा क्षति पुग्नुका साथै इन्टरनेट सेवा अवरुद्ध भएपछि अदालतका नियमित सेवा प्रवाहमा समस्या आएको जानकारी दिएको छ ।
सार्वजनिक यातायात बन्द हुनुका कारण अदालतमा पक्षकारहरूको उपस्थितिमा समेत कठिनाइ भएको सूचनामा उल्लेख गरिएको छ । यस्तो अवस्थामा अदालतले अत्यावश्यक प्रकृतिका सेवा मात्र सञ्चालन गर्ने निर्णय गरेको छ । जारी सूचना अनुसार हालका लागि अन्तिम तारिखमा पेश गर्नुपर्ने अभियोग वा प्रतिवेदन दर्ता गर्ने काम र पक्राउ पुर्जी जारी÷जरुरी पक्राउ पुर्जी स्वीकृत, थुनुवा÷बन्दी प्रत्यक्षीकरणका निवेदन दर्ता गर्ने काम मात्र हुनेछन ।
अदालतले अन्य सबै सेवा अर्को सूचना जारी नभएसम्मका लागि स्थगित गरिएको स्पष्ट पारेको छ । देशव्यापी रूपमा भएको जेन—जी आन्दोलनका कारण स्याङ्जा जिल्ला अदालतको सूचना प्रवाह र मुद्दा व्यवस्थापन प्रणाली प्रभावित बनेको हो ।
देशभर फैलिएको जेन–जी आन्दोलनको प्रभावका कारण स्याङ्जा जिल्ला अदालतले अत्यावश्यक बाहेकका सम्पूर्ण सेवा अर्को सूचना नआएसम्मका लागि भन्दै भदौ २६ बिहीवारदेखि स्थगित गर्ने निर्णय गरेको छ । आन्दोलनका क्रममा सर्वोच्च अदालतमा सञ्चालित सर्भरमा क्षति पुग्दा मुद्दा व्यवस्थापन प्रणाली (सिएमएस) लगायत सम्पूर्ण इन्टरनेट सिस्टम अवरुद्ध भएका छन ।