स्याङ्जा २७ चैत । पुतलीबजार नगरपालिकाका वडा नं. ९ र १० मा रहेका सामुदायिक कुकुरका बन्ध्याकरण र रेबिज रोग बिरुद्धको खोप लगाइएको छ ।
पुतलीबजार नगरपालिका पशु सेवा शाखा र भेटेरिनरी अस्पताल तथा पशु सेवा विज्ञ केन्द्रको प्राविधिक सहयोगमा सो अभियान गरिएको हो ।
पुतलीबजार १० मा ८३ वटा कुकुरको बन्ध्याकरण गरिएको छ । यसैगरी, १ सय २ वटा कुकुरलाई रेबिज रोग विरुद्धको खोप लगाईएको डा. अनिल गौतमले जानकारी दिनुभयो ।
यसैगरी, नगरपालिका ९ मा ५५ वटा कुकुरमा बन्ध्याकरण र ८७ वटालाई रेबिज रोग विरुद्धको खोप लगाईएको छ । योसंगै दुई वडामागरि १ सय ३८ वटा कुकुरको बन्ध्याकरण र १ सय ८९ कुकुरलाई रेविज रोग बिरुद्धको खोप लगाइएको हो ।
कुकुरले टोकेर मानिसको ज्यानै जाने हुदाँ कुकुरको उपचारका लागि रेविज रोग बिरुद्धको खोप अभियान संचालन गरेको नगर प्रमुख तुलसीराम रेग्मीले जानकारी दिनुभयो । कुकुरमा बन्ध्याकरण र रेबिज बिरुद्धको खोप अभियान अपरिहार्य भएकाले निरन्तरता दिइएको प्रमुख रेग्मीको भनाई छ । समुदायमा रहेका कुकुरलाई सुरक्षित र स्वस्थ्य राख्नका लागि नगरपालिकाले यस्ता अभियान संचालन गरेको प्रमुख रेग्मीको भनाई छ ।
समुदायमा रहेका कुकुर सुरक्षित र स्वस्थ्य राख्ने उदेश्यले आउदा दिनमा पालिकाले क्रमशः सबै पालिकामा यस्ता अभियान पुरयाउने उपप्रमुख देवी अर्यालले जानकारी दिनुभयो ।