स्याङ्जा २१ असोज । भीरकोट नगरपालिकामा क्षत्री समाज जिल्ला शाखा स्याङ्जाले सामुदायिक बहुउद्देश्यीय भवन निर्माण गरेको छ । समाजको अगुवाईमा झण्डै एक करोड ५१ लाखको लागतमा बहुउद्देश्यीय भवन निर्माण गरेको हो ।
क्षेत्री समाजको नेतृत्वमा बनेको भवनमा एक करोड ११ लाखभन्दा बढी रकम समुदायस्तरबाटै स्वतःस्फूर्त रुपमा संकलन भएको अध्यक्ष मीनबहादुर केसीले जानकारी दिनुभयो । भवन निर्माणमा १६ जनाले एक लाख भन्दा बढी, २८ जनाले ५० हजार भन्दा बढी र ५७७ जनाले ५ हजार भन्दा बढी सहयोग गरेका छन् ।
भीरकोट नगरपालिका–१ मुख्यबजार बयरघारीस्थित पुलको मुखमा बनेको आधुनिक भवन ८ रोपनी ८ आना ३ पैसा क्षेत्रफलमा फैलिएको छ । गएको वर्ष २०८१ को घटस्थापनाका दिन शिलान्यास गरिएको भवन एक वर्षमै निर्माण सम्पन्न भएको अध्यक्ष केसीले जानकारी दिनुभयो ।
सात हजार १६५ वर्गफिट क्षेत्रफलको एकतले सभा भवनमा करिब एक हजार जनाको क्षमता रहेको छ । भवनभित्र बाथरूम, शौचालय, पोशाक परिवर्तन कक्ष, कार्यालय कक्ष, भान्साकक्ष र शुद्ध खानेपानीको सुविधा छ । भवनमै पुजाआजाकोलागि हवनकुण्ड पनि निर्माण गरिएको छ ।
भवनलाई धार्मिक, सांस्कृतिक, सामाजिक र राजनीतिक कार्यक्रमकालागि बडदशै २०८२ को अवसरमा सञ्चालनमा ल्याइएको हो । भवनमा योगा, जिम र बास्केटबल कोर्टको सुविधाथप्ने तयारी गरिएको समाजले जनाएको छ ।
भवन निर्माणमा समुदायसँगै भीरकोट नगरपालिकाले १० लाख रुपैयाँको सहयोग गरेको छ । समुदायकै सहयोगमा बनेको भवनले सामाजिक एकता र पर्यटन प्रवद्र्धनमा टेवा पु¥याउने स्थानीयले विश्वास गरेका छन् ।