स्याङ्जा २३ असोज । स्याङ्जाका बरिष्ठ साहित्यकार देवीप्रसाद वनवासीलाई अभिनन्दन गरिएको छ । साहित्यका क्षेत्रमा महत्वपूर्ण योगदान पु¥याएकोमा भेषजराज साहित्य प्रतिष्ठान, वालिङ, स्याङ्जाले साहित्यकार वनवासीलाई अभिनन्दन गरेको हो ।
वालिङ २ शङ्खरेडाँडा उहाकै निवासमा अभिनन्दन गरेको हो । मङ्गलबार साहित्यकार वनवासीको सहस्र चन्द्र दर्शन (८४ पूजा )को दिनका अवसरमा घरमा पुगी अभिनन्दन गरेको प्रतिष्ठानले जनाएको छ ।
वि. सं. १९९७ कार्तिक २७ गते स्याङ्जा जिल्लाको वालिङ नगरपालिका वडा नं. २ शङ्खरेडाँडामा जन्मेका वनवासीले माछापुच्छ्रेको काख (२०२०) कविता सङ्ग्रहबाट औपचारिक साहित्यिक यात्रा प्रारम्भ गर्नुभएको थियो ।
उहाका ६ दर्जन भन्दा धेरै सायित्यिक सिर्जना प्रकाशित छन् । आमाको सन्देश, शहीदको आत्मकथा, विस्कुन जस्ता कविता सङ्ग्रहहरू प्रकाशित भएका छन् ।
यसैगरी कथा कथौरी, केही रमाइला कथा, छुनुमुनु लगायतका कथा सङ्ग्रहहरू, असल मान्छे, अब्बल मान्छे जस्ता उत्कृष्ट बालजीवनीहरू, मुलुकभित्रै भौँतारिँदा, आकृति र अनुभुतिहरु जस्ता लेख–निबन्ध सङ्ग्रहहरू र आँधीखोले लोक संस्कृति (२०५५) सिर्जनाहरु हुन् । योसंगै उनले सम्पादन, अनुवाद र समीक्षाका क्षेत्रमा पनि कलम चलाउदै आउनु भएको छ ।
६ दशकभन्दा लामो समय भाषा– साहित्यको सेवामा समर्पित वनवासीले ४ दर्जनभन्दा बढी पुरस्कार एवम् सम्मान पाइसकेका छन् । भेषजराज साहित्य प्रतिष्ठानले २०७४ सालमा उनलाई भेषजराज साहित्य सम्मानद्वारा पनि सम्मानित गरेको थियो ।