स्याङ्जा १५ असार । नयाँ धान, नयाँ आशा, समृद्ध नेपालको आधार भन्ने मूल नाराका साथ स्याङ्जामा पनि राष्ट्रिय धान दिवस मनाइएको छ ।
पुतलीबजार नगरपालिका १४ लामागे फाटमा आयोजित कार्यक्रममा कृषि ज्ञान केन्द्र स्याङ्जाको मुख्य सहयोग र पुतलीबजार नगरपालिका, कृषि बीउ उत्पादन केन्द्र वालिङ, प्रधानमन्त्री कृषि आधुनिकीकरण सुन्तला सुपरजोन स्याङजा, गण्डकी यातायात बस ब्यवसायी समिति स्याङ्जाको बिशेष सहयोगमा रोपाई महोत्सव गरिएको हो ।
शिवालय कृषि तथा पशुपालन सहकारी संस्थाको आयोजना जीवन बिज्ञान स्याङजाको समन्वय र जिल्ला प्रहरी कार्यालय स्याङ्जाको ब्यवस्थापनमा दिवसमा बिबिध कार्यक्रम सहित मनाइएको छ ।
दिवसको उदघाटन गर्दै प्रमुख जिल्ला अधिकारी इश्वरीप्रसाद अर्यालले नेपालको भूमि कृषि उत्पादनका लागि अति उपयुक्त भएको बताउनुभयो । त्यसमा पनि धान उत्पादनगरि आत्मनिर्भर बन्नु पर्नेमा जोड दिनुभयो । नेपालीका मुख्य खाद्यबालीका रुपमा रहेको धान उत्पादन बढाउनेगरि लाग्नु पर्ने उहाले भन्नुभयो ।
कार्यक्रममा कृषि ज्ञान केन्द्रका प्रमुख बिनोद हमाल, प्रहरी उपरीक्षक दधिराम न्यौपाने लगायतले दिवसको शुभकामना मन्तब्य ब्यक्त गर्नुभएको थियो । सहकारीका अध्यक्ष सीता पुरीको अध्यक्षतामा सम्पन्न कार्यक्रममा जीवन बिज्ञानका जिल्ला संयोजक राधा अर्यालले स्वागत र नगर संयोजक निर्मला लम्सालले संचालन गर्नुभएको थियो ।
यसैगरी, धान रोपाइृ सहित डोरी तान्ने साथीलाई बोकेर दोैडने प्रतियोगिता गरिएको थियो । डोरी तान्ने प्रतियोगितामा महिला तथा पुरुषको प्रतिस्पर्धामा दुबैतर्फ जिल्ला प्रहरी कार्यालय प्रथम भएको छ । यसैगरी, साथीलाई बोकेर हिड्ने प्रतियोगितामा पनि प्रहरी कार्यालय प्रथम र जीवन विज्ञान द्धितिय भएका छन । दिवसमा औपचारिक कार्यक्रमसंगै धान रोपेर मनाइएको छ ।
असार १५ अर्थात् राष्ट्रिय धान दिवस मनाइँदै छ । असार १५ लाई नेपाली समाजमा दही चिउरा खाने पर्वका रूपमा पनि मनाइन्छ । कामको चटारोले थकित भएका किसान शक्ति प्राप्तिका लागि दही चिउरा खाँदा शरीरमा शीतलता भई शक्ति सञ्चय हुने विश्वास गरिन्छ । खेतीपातीबाहेक अन्य पेसा र व्यवसायमा लागेका नेपालीले पनि आज दही चिउरा खाई असार १५ मनाउँने गरिन्छ । विसं २०६१ मंसिर २९ गते मन्त्रीस्तरीय निर्णय गरी २०६२ साल असार १५ गतेदेखि राष्ट्रिय धान दिवस मनाउन थालिएको हो ।
कृषिप्रधान देश भएकाले नेपालका अधिकांश मानिसको पेसा खेतीपाती हो । किसान वर्षभरका लागि छाक जुटाउन यो महिना खेतीमा व्यस्त हुन्छन् । आजका दिन असारे भाकामा लोकदोहोरी गाउँदै छुपुछुपु हिलोमा धान रोपिन्छ । मध्य गर्मीको यो समयमा युवा लाठे र युवती रोपाहारले खेतका गराको हिलो छ्यापाछ्याप गरेर मनोरञ्जन गर्छन् । असारमा एकपटक हिलोमा पस्नैपर्ने मान्यता पनि रहेको छ ।
