स्याङ्जा २८ कात्तिक । कालीगण्डकी गाउँपालिकामा भएको राष्ट्रपति रनिङ शिल्ड प्रतियोगिताको उपाधी आदर्श माविले जितेको छ ।
“सबैका लागि खेलकुद, स्वास्थ्यका लागि खेलकुद, राष्ट्रका लागि खेलकुद” भन्ने मूल नाराका साथ बुधवारदेखि आयोजित प्रतियोगितामा १४ बिद्यालय सहभागी थिए ।
कालीगण्डकी — २ लसर्घामा रहेको आदर्श माविले ९ स्वर्ण, ६ रजत र ६ काश्य सहित २१ पदक ल्याएर उपाधी जितेको हो ।
पाँच स्वर्ण ६ रजत र २ कास्य गरी १३ पदक सहित भगवती मावि दोश्रो , ४ स्वर्ण, ४ रजत र ४ कास्य सहित १२ पदक सहित जनता मावि तेस्रो भएको छ ।
प्रतियोगितामा २ स्वर्ण, ३ रजत र ८ कास्य पदक सहित मिर्मि आधारभूत विद्यालय सान्त्वना भएको छ । भलिबल, ट्रिपलजम्प, एथलेटिक्स (दौड), ज्याभलिन थ्रो, हाईजम्प, सटपुट, लङ्जम्प, कबड्डी र टेक्वान्दो लगायतका विभिन्न खेलमा ९ सय ८८ जना विद्यार्थी प्रतिस्पर्धी थिए ।
प्रतियोगिताको उदघाटन गण्डकी प्रदेश सदस्य महेश भट्टराइले गर्नुभएको थियो । प्रतियोगिताको उद्घाटन समारोहमा गण्डकी प्रदेश सांसद महेश भट्टराईले खेलकुदका माध्यमबाट विद्यार्थीहरुमा एकता र सद्भावको विकास हुने बताउनुभयो । देशमा जारी संकट समाधानका लागि सबै राजनीतिक दलहरु एकजुट हुनुपर्ने बताउनुभयो ।
कार्यक्रममा गाउँपालिका राष्ट्रिय महासंघका महासचिव एवं कालीगण्डकीका अध्यक्ष खिमबहादुर थापाले कालीगण्डकी गाउँपालिकाका विद्यार्थी र खेलाडी राष्ट्रिय स्तरमा पुग्न सफल भएको बताउनुभयो । खेलकूद मार्फत विद्यार्थीहरूमा आत्मविश्वास, नेतृत्व क्षमता र अनुशासन विकास बढाउने उदेश्यले प्रतियोगिता आयोजना गरेको अध्यक्ष खिमबहादुर थापाले जानकारी दिनुभयो ।
