स्याङ्जा २३ मंसिर । भीरकोट नगरपालिकाले आयोजना गरेको राष्ट्रपति रनिङ शिल्ड प्रतियोगिताको उपाधी भाग्योदय माध्यमिक विद्यालयले हात पारेको छ ।
भीरकोट खेलमैदानमा ५ दिनसम्म चलेको प्रतिस्पर्धामा भाग्योदयले १४ स्वर्ण, ७ रजत र ५ कास्य सहित २६ पदकसहित प्रथम स्थानमा रहन सफल भएको हो । भाग्योदय माविले शिल्ड, ट्रफी, मेडल र प्रमाणपत्र प्राप्त गरेको छ ।
सहिद शुक्र माध्यमिक विद्यालयले ५ स्वर्ण, १० रजत र ४ कास्य पदक जित्दै दोस्रो भएको छ । दहथुम माध्यमिक विद्यालयले ३ स्वर्ण, ३ रजत र ७ कास्य पदक जित्दै तेस्रो बनेको छ । दोस्रो र तेस्रो हुने यी दुबै विद्यालयले ट्रफी, मेडल र प्रमाणपत्र हात पारेका छन् ।
स्थानीयतहदेखि राष्ट्रिय स्तरसम्म पुग्न सफल भएको भन्दै खेलाडी सुशील खड्कालाई नगद सहित सम्मान गरिएको थियो ।
भलिबल, कबड्डी, दौड, हाईजम्प, लङजम्प, ज्याभलिन थ्रो र सटपुटजस्ता खेल समावेश रहेको प्रतियोगितामा १७ विद्यालय सहभागि थिए ।प्रतियोगितामा सहभागी ४ विद्यालयले कुनै पदक हात पार्न सकेनन् भने ५ विद्यालय स्वर्ण पदक विहीन बने ।
पुरस्कार वितरण गर्दै निवर्तमान नगरप्रमुख छायाराम खनालले खेलकुदले एकता र अनुशासनको भावना बढाउने भन्दै निरन्तर सहभागिता नै महत्वपूर्ण भएको बताउनुभयो । खेल व्यवस्थापन समितिका अध्यक्ष एवं नगर प्रवक्ता दिपेन्द्र केसीले प्रतियोगिता सफल बनाउन योगदान गर्ने सबैलाई धन्यवाद व्यक्त गर्दै नगरको खेलकुद विकासमा निरन्तर सहकार्यको अपेक्षा व्यक्त गर्नुभयो ।
प्रतियोगिता मङ्सिर १८ देखि २२ गतेसम्म संचालन भएको थियो ।