स्याङजा २३ जेठ । चापाकोट नगरपालिकामा सञ्चालन भएको १३ औं जिल्ला स्तरिय राष्ट्रपति रनिङ् शिल्ड प्रतियोगिताको उपाधि गल्याङ् नगरपालिकाले हात पारेको छ ।
प्रतियोगितामा गल्याङ्ले १५ स्वर्ण, ६ रजत र ७ कास्य गरी कुल २८ पदक सहित पहिलो बनेको हो । प्रतियोगिताको विभिन्न तौल समुहको कराते तर्फको १२ प्रतियोगितामा १२ स्वर्ण पदक प्राप्त गरेको गल्याङ नगरपालिकाले छात्र ८ सय मिटर दौड, छात्रा १ सय मिटर दौड र छात्रा हाइजम्पमा स्वर्ण पदक जितेको हो ।
प्रतियोगितामा गल्याङ नगरपालिकाबाट सहभागीता जनाएका खेलाडी र प्रशिक्षकलाई गल्याङ नगरपालिकाले एक कार्यक्रमका बिच सम्मान गरेको छ । राष्ट्रपति रनिङ शिल्डको उपाधी जित्ने गल्याङ नगरपालिकाका खेलाडीलाई गल्याङ नगरपालिकाले १ लाख नगद सहित सम्मान गरेको हो ।
जिल्ला खेलकुद विकास समिति स्याङ्जाको आयोजनामा सञ्चालन भएको प्रतियोगितामा कक्षा १२ सम्म अध्ययनरत र १८ वर्ष उमेर ननाघेका विद्यार्थीबीच प्रतिस्पर्धा भएको थियोे ।
