स्याङजा १२ चैत । पुतलीबजार नगरपालिकाले महिलाहरुलाई लक्षित गर्दै बिहीवारबाट जारी मादल बजाउन सिकाउने तालिम मंगलबार सकिएको छ ।
पुतलीबजार नगरपालिका १ स्थित सिटीहलमा आयोजित ५ दिने तालिमको समापन गर्दै नगर प्रमुख तुलसीराम रेग्मीले हाम्रा धर्म, रितीरिवाज, कला, संस्कृतिको संरक्षण एवं सम्बद्र्धन गर्ने महत्वपूर्ण वाद्यवादक सबैले सिक्न जरुरी रहेको बताउनुभयो ।
सबै खालका सांस्कृतिक एवं सामाजिक कार्यमा पनि प्रयोगमा ल्याईने मादलको उपयोगीता अत्यन्तै धेरै रहेको जनाउदै नगरपालिकाले आफना नगरभित्रका सबै वडामा यस्ता खालका तालिम उपलब्ध गराउने प्रतिबद्धता प्रमुख रेग्मीले जनाउनुभयो ।
मादल बजाउन जान्नु सिपको विकास गर्दै उद्यमशिलतामा जोडिन समेत उहाले आग्रह गर्दै आधारभूतको तालिमको प्रभावकारिता हेरेर आउदा दिनमा एडभान्स तालिम समेत उपलब्ध गराउने प्रमुख रेग्मीले जोड दिनुभयो ।
कार्यक्रममा उपप्रमुख देवी अर्यालले रोजगार खोजीका कारण गाउँघरमा पुरुषको संख्या घट्दै गएको जनाउदै महिलाका लागि यस्ता वाद्यवादक सिक्न जरुरी रहेको बताउनुभयो । तालिमपछि अव बिवाह, ब्रतबन्ध, रत्यौली, भजनकितृनमा महिलाहरुले मादल बजाउन सक्ने भएपछि खेताला खोज्नु पर्ने आवश्यकता नपर्नेमा उपप्रमुख अर्यालले जोड दिनुभयो ।
कार्यक्रममा नगरप्रबक्ता मनोज पौडेल, वडा न ४ का कार्यबाहक अध्यक्ष लिलावती पौडेल, कार्यपालिका सदस्य संजीता नेपाल, नगर विकास समिति सदस्य तारा मल्ल, पुतलीबजार महिला संजाल संयोजक सीता गोदार, एकल महिला संजालका संयोजक लक्ष्मी पौडेल, प्रशिक्षक श्यामबहादुर जि.टी, सहभागी सपना शर्मा लगायतले तालिमको उपयोगिता र आवश्यकताका बारेमा बोल्दै तालिमले सकारात्मक प्रभाव पारेकोमा जोड दिनुभयो ।
उपप्रमुख देवी अर्यालको अध्यक्षतामा सम्पन्न कार्यक्रमको संचालन महिला तथा बालबालिका शाखा प्रमुख ठगीकुमारी खनालले गर्नुभएको थियो ।
मादल बजाउनका लागि ५ दिन श्यामबहादुर जिटीले प्रशिक्षण दिनुभएको थियो भने तालिममा १४ वडाका ३२ जना महिला सहभागी हुनुहुन्थ्यो ।
