स्याङ्जा २० असार । पुतलीबजार नगर कार्यपालिकाको कार्यालयको आयोजना तथा सामुदायिक रेडियो स्याङ्जा एफ एम तथा स्याङ्जा टेलिभिजनको सहजीकरणर ब्यबस्थापनमा पुतलीबजार नगरपालिका ५ पौवैगौडेमा सार्वजनिक सुनुवाई गरिएको छ ।
पुतलीबजार नगरपालिकाको सेवा प्रबाह नीति, योजना र कार्यक्रम बारेमा चालु आर्थिक बर्षको अन्तिम चौमासिक सार्बजनिक सुनुवाइ शितला माध्यमिक बिद्यालयमा भएको हो ।
नगर प्रमुख तुलसीराम रेग्मीले सार्वजनिक सुनुवाईमा उठेका जिज्ञासाको जवाफ दिँदै नगरपालिकाले शिक्षा, स्वास्थ्य, पूर्वाधार लगायतका क्षेत्रमा महत्वपूर्ण काम गरेको बताउनुभयो । उहाँले नगरपालिकाका सेवा प्रवाहमा कर्मचारीले ढिला सुस्ती र अनियमितता गरेको पाएमा तुरुन्त खवर गर्न आग्रह गर्नुभयो ।
उहाँले नगरपालिकाको सेवाप्रवाह, निति, योजना तथा कार्यक्रम, विकास निर्माणसँग सम्बन्धित गतिविधीको गहिरो समीक्षा गरेर सुधार गर्ने कुरामा प्रतिवद्धता समेत व्यक्त गर्नुभयो ।
कार्यक्रममा प्रमुख प्रशासकीय अधिकृत धर्मराज ढुंगानाले नगरपालिकाको योजना तर्जुमा, योजनाको कार्यन्वयन र अनुगमन मुल्याङ्कनमा सबैको सहयोग रहनुपर्ने कुरामा जोड दिनुभयो ।
पुतलीबजार नगरपालिका ५ का वडा अध्यक्ष अर्जुनकुमार कार्की, नेपाली कांग्रेसका नगर सभापति सुरजकुमार अधिकारी, वडा सदस्य कमला गुरुङ्ग लगायतले नगरपालिकाका योजनागत रुपमा गरिएका कार्यहरुका बारेमा जानकारी गराउनुभयो ।
यसैगरी, नगरपालिकाका प्रशासन शाखा प्रमुख धनप्रसाद कोइराला, योजना शाखा प्रमुख डोलराज ढकालले कार्यालयका गतिबिधिका बारेमा जानकारी गराउनुभयो ।
स्थानीयबासी रामबहादुर परियार, गालीमाया थापा, गौतम सिंह ठकुरी, काले कामी, लगायतले पुतलीबजारको विकास निर्माण र सेवाप्रवाहका विषयमा जिज्ञासा राखेका थिए ।
नगरप्रमुख तुलसीराम रेग्मीको अध्यक्षतामा सम्पन्न कार्यक्रममा स्वागत मन्तव्य उपप्रमुख देवी अर्यालले र सहजीकरण रेडियो स्याङजा तथा स्याङजा टेलिभिजनका प्रमुख व्यवस्थापक रमेश गोदारले गर्नुभएको थियो ।
