स्याङ्जा ११ कात्तिक । स्याङ्जाको सदरमुकाममा रहेको पुतलीबजार नगरपालिकाले ठूला पूर्वाधार विकास योजनामा साँढे ११ करोड लगानी गर्ने भएको छ ।
आर्थिक वर्ष २०८२÷०८३ मा नगरपालिकाले नगरभित्रका २४ वटा ठूला योजनाहरुलाई ११ करोड ५६ लाख रुपैयाँ लगानी गर्ने भएको हो । योजनाहरुमा संघ, प्रदेशको अनुदान र नगरपालिकाको आन्तरिक श्रोत समेतको साझेदारीमा उक्त रकम खर्च हुनेछ ।
ठूला योजनामध्ये एक करोड ४० लाखको लगानीमा फोहोरमैला व्यवस्थापन, एक करोड ३५ लाखको लागतमा आमडाँडा–सतौ सडक निर्माण गर्नेछ । ९०÷९० लाखको लगानीमा मायाँटारी, पोखरीचौर–बेलबास सडक स्तरोउन्नती गरिने छ भने पुतलीबजार नगरपालिका–१४ को वडा कार्यालय–मैदान जोड्ने सडक निर्माण गर्ने लक्ष्य राखिएको नगरपालिकाले जनाएको छ ।
सडक बोर्डसँगको साझेदारीमा ८० लाखको लगतमा नगरपालिकाले आवश्यकताका आधारमा झोलुङ्गे निर्माण गर्ने जनाएको छ । ६७ लाख रुपैयाँको लगानीमा नगरपालिकाको वडा नं.–१ मालेबगरस्थित खेल पूर्वाधारमा मैदान र कभर्ड हलको व्यवस्थापन र स्तरोउन्नती गर्ने तयारी गरिएको नगरपालिकाका योजना शाखाका डोलराज ढकालले जानकारी दिनुभयो ।
चालु वर्षमा पूर्वाधार तर्फका एक दर्जन योजनाहरु कार्यान्वयनको चरणमै पुगिसकेको ढकालले बताउनुभयो । नगरपालिकाले सडक स्तरोउन्नती तर्फका ठूला योजनालाई कालोपत्रे र ढलान गर्नेछ । नगरका २४ वटै ठूला योजना समयमै निर्माण कार्य सक्नेगरी तयारी गरिएको ढकालले जनाउनुभयो ।
नगरपालिकाले ६० लाखको लागतमा सडक स्तरोउन्नती, ४०÷४० लाखको लगानीमा तीन वटा योजना कान्छिबजार–आरुपाटा, सुम्रखोला–ओढोर–ढिम्रीगाउँ र छिपेहटिया–अर्जुनचौचारी–खोरबार जाने सडक निर्माण गर्नेछ । ३६ लाखको लागतमा मासुमा आत्मनिर्भर तथा स्वास्थ्य मासु उत्पादन परियोजना संचालन गर्ने भएको नगरपालिकाले जनाएको छ ।
टापु सिँचाइ योजनाको दोस्रो चरणका लागि ३५ लाख विनियोजना गरेको नगरपालिकाले ३०÷३० लाखको लगानीमा रिङ्दी–स्यालढुङ्गा कुलो निर्माण गर्नेछ । २५ लाखका ७ योजनामध्ये खानेपानी, भवनको संरचनात्मक सुधार, विश्व शान्तिस्तुपा भवन निर्माणसँगै सडकहरु निर्माण र स्तरोउन्नती गर्ने लक्ष्य राखिएको नगरपालिकाका प्रमुख प्रशासकीय अधिकृत धर्मराज ढुङ्गानाले सुनाउनुभयो ।
गएको आर्थिक वर्षको दायित्व भुक्तानीमा २३ लाख २५ हजार रुपैयाँ व्यवस्था गरेको नगरपालिकाले बहाकोट स्वास्थ्य चौकी समेतका दुई योजनालाई २०÷२० लाख विनियोजन गरेको छ । नगरका पूर्वाधार योजनामा नगरपालिकाले साँढे ११ करोड खर्च गर्ने लक्ष्य राखेको भएपनि पुतलीबजार नगरमा पूर्वाधार, खानेपानी र सिँचाइ कार्यालयले झण्डै ५० करोडका योजनाहरु निर्माण गर्नेछन् ।
नगरपालिकाले चालु आर्थिक वर्षमा सम्पन्न गर्ने लक्ष्य राखेका योजनामा नगरपालिकाको आन्तरिक श्रोत, संघीय सरकारको विषेश, समपुरक र शसर्तसँगै प्रदेश सरकारबाट हस्तातरित कार्यक्रममा समाबेश आयोजनाहरु रहेको नगरपालिकाका नगर प्रमुख तुलसीराम रेग्मीले बताउनुभयो । वडास्तर र नगर तहबाट साना र ठूला गरी करिब १५० योजनाहरुलाई चालु वर्षमा झण्डै ५० करोड विनियोजन गरिएको प्रमुख रेग्मीको भनाई छ ।
देश संघीयतामा गएसँगै बनेका स्थानीय तहले पूर्वाधार विकास निर्माणलाई प्राथमिकता दिएका छन् । पछिल्लो समय विकासको गति हेर्दा स्थानीय तहबीच कसले छिटो र राम्रो पूर्वाधार बनाउने भन्ने प्रतिस्पर्धा नै चलेको जस्तो भान हुन्छ । यसैक्रममा स्याङ्जाका ११ स्थानीय पालिकाले पूर्वाधार विकासलाई उच्च प्राथमिकता दिदै बजेटको ठूलो हिस्सा खर्च गर्दै आएका छन् ।