स्याङ्जा, २३ भदौ । विकासको प्रमुख आधार भएको मान्दै तिनै तहका सरकार पछिल्लो समय सडक तथा पूर्वाधार निर्माणमा केन्द्रित छन् । सडक नबन्दासम्म विकासमा पछाडी पर्यौ भन्ने हाम्रो मानसिकता छ । आमनागरिकको बुझाईसँगै सरकारले पुँजीगत खर्चको ठूलो हिस्सा सडक र पूर्वाधार निर्माणमै लगानी गरेको छ । केन्द्र तथा स्थानीय तहले पूर्वाधार निर्माणलाई प्राथमिकता दिएको जस्तै स्याङ्जाको पुतलीबजार नगरपालिकाले सडक समेतका पूर्वाधारमा झण्डै ५७ करोड लगानी गरेकोे छ ।
पुतलीबजारले ठूला सडक तथा पूर्वाधारतर्फ ९ वटा सडकमा ५२ करोड ६१ लाख ७६ हजार २९१ र सिँचाइ तथा खेलकुदमा ४ करोड ६७ लाख ८३ हजार ९१२ रुपैयाँ लगानी गरेको नगर प्रमुख तुलसी रेग्मीले बताए । आर्थिक वर्ष २०८१÷०८२ मा नगरका ठूला ११ सडक र पूर्वाधार निर्माणमा ५७ करोड २९ लाख ६० हजार २०३ रुपैयाँ लगानी गरेको रेग्मीले जानकारी दिनुभयो ।
स्याङ्जा र तनहुँ जोड्ने प्रगतिनगर–बहाकोट, काल्खु सडकमा ३६ करोड ५३ लाख २८ हजार ४४३ रुपैयाँ लगानी भएको पुतलीबजारको सबै भन्दा ठूलो योजना हो । करिब ७ किलोमिटर पक्की सडक संघीय सरकार माफर्त विश्व बैंकको झण्डै ४५ करोड सहुलियत ऋण सहयोगमा निर्माण गरेको पुतलीबजारले जनाएको छ । ट्रयाक खोलेको झण्डै २५ वर्षपछि स्तरोन्नती गरिएको सडक समयसिमा भित्रै एकै वर्षमा निर्माण भएको हो ।
पुतलीबजारले पुतलीखेत–सतौ, आरुचौर जोड्ने सडकमा ७ करोड ५२ लाख, नयाँबजार–ठूलाडिही सडक स्तरोन्नतिमा ५ करोड १७ लाख लगानी भएको जनाएको छ । बाडखोला–नयाँबजार खण्डको चम्फापानीमा एक करोड १५ लाख लगानी भएको नगर प्रमुख तुलसीराम रेग्मीले मसर्का–मोहोरिया, रामकोष–नयाँखोरिया, जाँडखोला–पेल्काचौर, नयाँबजार–पौवैगौडे, टक्सार र पुराना सडकको स्तरोन्नती गर्न झण्डै ३ करोड लगानी गरेको सुनाउनुभयो ।
जिल्ला मुकाममै झण्डै ५ करोडको लागतमा १० वर्षपछि कभर्डहल निर्माण भएको छ । गएकै वर्ष पुतलीबजारले दुई करोड ७५ लाख २३ हजार लगानी गरेपछि कभर्डहल निर्माण सम्पन्न भएको हो । करोडौ लगानीमा वर्षौपछि बनेको कभर्डहलमा ब्याडमिन्टनका ४ टिमलाई खेल्न मिल्ने दुईवटा कोटमात्रै छन् ।
पुतलीबजारले पूर्वाधार तर्फकै ठूला योजना सिँचाइमा एक करोड ९२ लाख, खानेपानी संरचनामा एक करोड ६ लाख ८२ हजार, सरसफाई संरचनामा ३४ लाख ५० हजार र भवनको संरचनात्मक सुधारमा २० लाख ५० हजार लगानी गरेको जनाएको छ । गएकै वर्षमा १४ वटा वडाका दुई दर्जन सडकहरुमा पुतलीबजारले करिब २ करोड रकम खर्चेर स्तरोन्नति गरेको जनाएको छ ।
आर्थिक वर्ष २०८१÷०८२ को एक अर्ब ३४ करोड ६० लाख ५६ हजार ४१५ रुपैयाँको कुल बजेटमा एक अर्ब ११ करोड १४ लाख १९ हजार अर्थात ८२ प्रतिशत कुल वित्तीय प्रगति प्राप्त गरेको पुतलीबजारले पुँजीगत शिर्षकको भौतिक निर्माणमा ७९ प्रतिशत रकम खर्च गरेको छ ।