स्याङ्जा १५ चैत । स्याङ्जा अपांग समाज स्याङ्जाको आयोजना तथा पुतलीबजार नगरपालिकाको समन्वयमा अपांगता सम्बन्धी अभिमुखीकरण कार्यशाला सहित अपांगताका बारेमा सन्देशमूलक शब्दावली सामाग्री सार्वजनिकरण गरिएको छ ।
दुई दिने सो कार्यशालामा वडाअध्यक्षहरु, शाखा प्रमुखहरु तथा वडा सचिवलाई लक्षित गर्दै सुरु भएको कार्यशालाको उदघाटन गर्दै नगरप्रमुख तुलसीराम रेग्मीले अपांगताका क्षेत्रमा पुतलीबजार नगरपालिका संवेदनशील रहेको बताउनुभयो । संघिय सरकारले क र ख बर्गभित्र पर्ने अपांगता भएका ब्यक्तिलाई स्वास्थ्य बिमा उपलब्ध गराउदै आएको भए पनि पुतलीबजारले भने ग बर्गका ब्यक्तिलाई निशुल्क स्वास्थ्य बिमाको सेवा उपलब्ध गराएको बताउनुभयो ।
आउदा दिनमा पनि नगरपालिका अन्र्तगतका सबै शाखाका प्रमुखसंग छलफल गरेर स्वास्थ्य, शिक्षा तथा भौतिक निर्माणमा अपांगतामैत्री पालिका बनाउनगरि निति तथा कार्यक्रम र बजेट ल्याउने बताउनुभयो । अपांगता सम्बन्धी बिभिन्न खालका प्रशिक्षण सहित सहयोगी सामाग्री उपलब्ध गराउदै आएको जनाउदै आउदा दिनमा पनि यस्ता कार्यलाई निरन्तरता दिईनेमा जोड दिनुभयो ।
कार्यक्रममा प्रमुख प्रशासकिय अधिकृत धर्मराज ढुंगाना, नगरप्रवक्ता मनोज पौडेल लगायतले सिमित स्रोत, साधन र जनशक्तिका अभावका कारण अपांगताका सेवा सुबिधालाई पूर्ण कार्यान्वयनमा ल्याउन नसकिएको जनाउदै आउदा दिनमा क्रमश ः थप गर्दै जाने बताउनुभयो ।
कार्यशालामा अपांगता शसक्तिकरण सामुदायिक विकास केन्द्र नेपाल स्याङ्जाका अध्यक्ष युवराज पराजुलीले अपांगता भएका ब्यक्तिका अधिकार सम्बन्धी ऐनमा भएका ब्यवस्था र अपांग संरक्षण समाज लम्जुङका अध्यक्ष चन्द्रकान्त पौडेलले अपांगताका बारेमा प्रशिक्षण दिनुभएको थियो ।
समाजका अध्यक्ष राम शर्मा पोखरेलको अध्यक्षतामा सम्पन्न कार्यक्रमको संचालन सचिव इन्द्रप्रसाद पराजुलीले गर्नुभएको थियो ।