स्याङ्जा २१ जेठ । गण्डकी प्रदेश सरकार कुषि, भूमि ब्यवस्था तथा सहकारी मन्त्रालय पोखराको संयोजन तथा कृषि ज्ञान केन्द्र स्याङ्जाको समन्वयमा बुधवार यहाँका पसलहरुको अनुगमन तथा निरीक्षण गरिएको छ ।
स्याङ्जा सदरमुकाम अर्थात पुतलीबजार नगरपालिकामा स्थापित ३२ वटा पसलहरुको अनुगमन तथा निरीक्षण गरिएको हो ।
पुतलीबजार नगरपालिका १ स्थित वीपी चोकदेखि हुलाक रोड सहिदचोक, घुम्ति बजार, प्रगतीनगरका खाद्य पसल, किराना पसल, तरकारी, फलफूल लगायतका पसलहरुको अनुगमन तथा निरीक्षण गरिएका छन् ।
अनुगमनका क्रममा केही पसलमा मूल्य सूची नराखिएको, म्याद गुज्रेका पेय तथा खाद्य पदार्थ भेटिएको, पसलमा बोर्ड नराखिएको भेटिएको थियो ।
ती खाद्य तथा पेय बस्तु तत्कालै नष्ट गरि पुन ः यस्ता कार्य नगर्न सुझाव दिइएको खाद्य अनुसान्धान अधिकृत कुमार भण्डारीले जानकारी दिनुभयो । पसल संचालकलाई मुल्यसूची राख्न, म्याद गुज्रेका खाद्य तथा पेय बस्तु छुट्टाएर राख्न, पसलको बोर्ड राख्न र पुनः यस्ता गल्ती नदोरयाउन समेत सुझाव दिइएको छ ।
क्रेता तथा बिक्रेता दुबैले स्वस्थ्य खाद्य बस्तुको उपयोग गरि स्वस्थ्य रहुन भन्ने उदेश्यले कृषि तथा भूमि ब्यवस्था तथा सहकारी मन्त्रालयले यस्ता अभियान सुरु गरेको मन्त्रालयका उपसचिव पुष्पराज बरालले बताउनुभयो । बढ्दो अखाद्य बस्तु मिसावट तथा म्याद गुज्रेका बस्तुको बिक्री बितरणको नियन्त्रणका लागि संघ, प्रदेश र स्थानीय तहको समन्वय हुनु जरुरी रहेको उहाले भन्नुभयो ।
अनुगमनका लागि कृषि, भूमि ब्यवस्था तथा सहकारी मन्त्रालय, खाद्य पदार्थ गुण नियन्त्रण कार्यालय पोखरा, जिल्ला प्रशासन कार्यालय स्याङ्जा, जिल्ला प्रहरी कार्यालय, पुतलीबजार नगरपालिका, कृषि ज्ञान केन्द्र, पर्यटन तथा उद्योग कार्यालय, स्याङ्जा जिल्ला उद्योग वाणिज्य संघ, उपभोक्ता मंच, पत्रकार लगायतको सहभागिता थियो ।
