स्याङ्जा २३ असार । फेदिखोला गाउँपालिकालाई बालश्रम र सडक बालबालिका मुक्त पालिका घोषणा गरिएको छ । घोषणा गरिएसंगै बालश्रम र सडक बालबालिमा मुक्त पालिका घोषणा गरिनेमा फेदिखोला जिल्लाकै दोश्रो पालिका बनेको छ ।
सडक बालबालिकाको उद्धार र ब्यवस्थापन गरौं, बाल श्रम अन्त्य गरौं भन्ने मुल नाराका साथ सोमबार गाउँपालिकालाई बालश्रम र सडक बालबालिका मुक्त पालिका घोषणा गरिएको हो ।
गाउँपालिकामा आयोजित औपचारिक कार्यक्रममा घोषणा गर्दै जिल्ला समन्वय समिति स्याङ्जाका प्रमुख श्रीप्रसाद घर्तिले बालअधिकारको संरक्षण तथा कार्यान्वयनका लागि गाउँपालिकाले गरेको कामको प्रशंसा गर्दै बर्षेनी पनि यस्ता सामाजिक कार्यलाई निरन्तरता दिन सुझाव दिनुभयो ।
सबै बालवालिकाले पाउनु पर्ने आधारभूत आवश्यकता संगै शिक्षा, सुरक्षाको ब्यवस्थाका लागि तीनै तहका सरकार गम्भीर भएर लाग्नु पर्नेमा जोड दिनुभयो । बालबालिकाको उज्वल भविष्य निर्माणमा हामी सबेैको सरोकारको बिषय भएको उहाले बताउनुभयो ।
बालअधिकारका सम्बन्धी संयुक्त राष्ट्र संघको बडापत्रमा हस्ताक्षर गरिसकेको नेपालले यस्ता कार्यलाई पछयाउनु सुखद रहेको प्रमुख घर्तिको भनाई छ ।
कार्यक्रममा उपप्रमुख खडगराज सुवेदी, वडा नं. ३ का अध्यक्ष कृष्णबहादुर रानाभाट, नेपाली कांग्रेसका सभापति महेन्द्र थापा, नेकपा एमालेका अध्यक्ष हर्कबहादुर कार्की, सिद्धार्थ बहुमुखी क्याम्पस प्रमुख पुष्पराज बराल, मैदान माविका प्रधानाध्यापक ख्यामप्रसाद सुवेदी, अमोर सेवा नेपालका संचालिका कमला पराजुली लगायतले शुभकामना मन्तब्य सहित गाउँपालिकालाई बालश्रम र सडक बालबालिका मुक्त बनाउने प्रतिवद्धता जनाउनुभयो ।
गाउँपालिका अध्यक्ष घनश्याम सुवेदीको अध्यक्षतामा सम्पन्न कार्यक्रममा उपाध्यक्ष देउकुमारी गुरुङले स्वागत एवं सामाजिक विकास शाखा प्रमुख शान्ति पराजुली र शिक्षा शाखा सहायक बिष्णुमाया पोखरेलले संचालन गरेका थिए ।
सोही कार्यक्रममा सिद्धार्थ माविमा अध्ययनरत सुयल सुवेदीले कबिता र अमोर सेवा नेपालका बालबालिकाले नाटक, नृत्य, गीत गाउनुभयो ।
यसैगरी, औपचारिक कार्यक्रम पूर्व फेदिखोला गाउपालिका वडा नं. २ स्थित मुख्य बजारको परिक्रमागरि सभामा परिणत गरिएको थियो । बिद्यालयका छात्रछात्रा सहित शिक्षक, कर्मचारी, जनप्रतिनिधि, अभिभावक, राजनीतिकर्मी लगायतको उपस्थिती रहेको थियो ।
सिद्धार्थ राजमार्गमा पर्ने गाउँपालिकाका मुख्य बजारमा बाल श्रमिक र सडक बालबालिका नभेटिएको पालिकाले जनाएको छ ।
पालिकाभित्र रहेका १ सय ५ जना विपन्न परिवारका बालबालिकालाई पनि जनही एक÷एक हजार नगद सहित शैक्षिक सामाग्री खरिदका लागि सहयोग गरिएको पालिकाका अध्यक्ष घनश्याम सुवेदीले जानकारी दिनुभयो ।
सोही कार्यक्रममा फेदिखोला गाउँपालिका १ स्थित अमोर सेवा नेपाल (बालगृह) लाई नगद सहित सम्मानपत्रद्धारा सम्मान गरिएको छ ।