स्याङ्जा १९ कात्तिक । स्याङ्जा प्रहरीले स्याङ्जाका विभिन्न मुद्दामा फरार रहेका ६ जना मध्ये ४ जना लाई पक्राउ गरेको छ भने दुई जनाको लगत कट्टा गरेको छ ।
फरार ४ जनालाई पक्राउ गरेको हो भने २ जनाको मृत्यु भएकाले लगत कट्टा गरिएको छ । अदालतका फैसला कार्यान्वयनगरि सुरक्षित र न्यायपूर्ण समाज निर्माण गर्ने लक्ष्य सहित पुराना जघन्य अपराधका कैदीहरुलाई नियन्त्रणमा लिने अभियान नै सञ्चालन गर्दै आएको छ ।
विभिन्न मितिमा मुद्दा फैसला भई कैद तथा जरिवाना भुक्तानको सजाए तोकेपछि फरार रहेका उनीहरुलाई जिल्ला प्रहरी कार्यालय, प्रहरी चौकी दहथुम, फेदिखोला र अस्थायी प्रहरी चौकी पौवेगौडेमा कार्यरत प्रहरी टोलीले ४ जनालाई पक्राउगरी कैद भुक्तान सहित जरिवाना असुलको लागि अदालतमा र त्यसपछि कारागार चलान गरेको छ ।
पक्राउ पर्नेहरुमा गल्याङ नगरपालिका ५ घर भई हाल पोखरा महानगरपालिका १३ मियापाटन बस्ने ३३ वर्षीय शान्ति गुरुङ, पुतलीबजार १२ पेल्काचौरका ४० वर्षीय टेक भन्ने डम्मर बहादुर गुरुङ, साविक नुवाकोट –४ पौवे मध्ये घुरवाला हाल पुतलीबजार ५ का जित बहादुर कार्की, र सोहि स्थानका सेती क्षेत्रीनीलाई प्रहरीले पक्राउ गरी अदालतमा पठाएको छ । उनीहरु डाँका कसुर, बैकिङ कसुर, पशुपंक्षी सम्बन्धी कसूर, चोरी मुद्धाका आरोपित हुन ।
यस्तै साविक सिर्सिकोट गा.वि.स. –०६ छापा घर भई हाल वालिङ १२ को डिलबहादुर गुरूङ, र साविक आरुखर्क गाविस वडा नं ८ हाल फेदीखोला गाउँपालिका ४ बस्ने हर्कबहादुर गुरुङको भने निधन भएकाले लगत कट्टा गरिएको नायब उपरीक्षक प्रसन्नराज चौधरीले जानकारी दिनुभयो ।