स्याङ्जा १७ चैत । नेपाल पत्रकार महासंघ स्याङ्जाले पत्रकार हत्या तथा आम संचार गृहमा भएको आक्रमणप्रती विरोध जनाएको छ ।
नेपाल पत्रकार महासंघ स्याङ्जाले आन्दोलनमा परी मृत्यु हुनुभएका पत्रकार सुरेश रजाकको हत्यारालाई कारवाहीको माग गर्दै विरोध गरेको हो ।
कार्यक्रममा बोल्दै पत्रकार महासंघ स्याङ्जाका अध्यक्ष प्रदिप कोईरालाले भिडियो खिचिरहेको घरमा पुर्वराजा ज्ञानेन्द्र शाहका समर्थकहरुले थुनेर आगो लगाएको घटनाको निन्दा गर्दै छानबिन र दोषी उपर कारबाहिको माग गर्नुभएको छ । उहाँले पत्रकार महासंघ स्याङ्जाले हिजो आज र भोलि विरोध तथा जिल्ला प्रशासन कार्यालय स्याङ्जामा ज्ञापनपत्र बुझाउने लगायतका कार्यक्रम आयोजना गरेको समेत जानकारी दिनुभयो ।
कार्यक्रममा बोल्दै पत्रकार महासंघ स्याङ्जाका पुर्व अध्यक्ष ओम प्रकाश शर्माले प्रेसलाई नियन्त्रणमा नलिए सम्म आफनो उद्देश्य पूरा नहुने हुदा आन्दोलनकारीले प्रेसलाई आक्रमण गर्ने कार्य गरेको बताउनुभयो ।
कार्यक्रममा पुर्वअध्यक्ष प्रकाश डोटेल, पुर्वउपाध्यक्ष भवानी अधिकारी, सदस्य युवराज पौडेल लगायतले पत्रकार सुरेश रजाकप्रति श्रद्धाञ्जली व्यक्त गर्दै प्रचलित कानुन बमोजिम घटनामा संलग्नलाइ कारबाहिको माग गर्नुभएको थियो ।
कार्यक्रमको सहजीकरण सह सचिव रमेश गोदारले गर्नुभएको थियो । स्याङ्जाको बयरघारी, वालिङ् र गल्याङ्मा पनि पत्रकार महासंघ स्याङ्जाले सो घटनाको निन्दा गर्दै विरोध कार्यक्रम गरेको छ ।
