स्याङ्जा १३ माघ । अर्जुनचौपारी गाउँपालिका १ पञ्चकन्या वन केटीचौर (सिमलचौर) मा अवस्थित पञ्चकन्या देवी मन्दिर परिसरमा निर्माणाधीन नवग्रह (नौ आकाशीय पिण्ड) मन्दिर व्यवस्थापन समितिको अध्यक्षमा भरतराज पोखरेल चयन हुनुु भएको छ ।
मन्दिरको संरक्षण र प्रवद्र्धनको जिम्मा समेत दिइ सबै वडालाई समेटेर ४५ सदस्यीय समिति गठन गरिएको हो । समितिको उपाध्यक्षमा नन्दकला तिवारी, सचिवमा लालबहादुर केसी, सहसचिवमा लोक कुमारी काफ्ले र कोषाध्यक्षमा बन्दना ढकाल रहनु भएको छ ।
यसैगरी, सदस्यहरुमा अर्जुन काफ्ले, चन्द्रकान्त अर्याल, दीपक सुनार, रुद्रबहादुर थापा, रेखकुमार रोका, हरि काफ्ले, युवराज गुरुङ, मैना थापा, सन्जु थापा, अन्जना शर्मा अर्याल, धुमराज गुरुङ, नवराज पौडेल, आई बहादुर गुरुङ, विजय गुरुङ, हुमनाथ देवकोटा लगायत रहनु भएको छ ।
मन्दिरमा वर्षेनि दस हजार भक्तजन भित्र्याउने लक्ष्य लिएको र मन्दिरमा भक्तजनबाट उठेको भेटी, चन्दाले नवग्रह मन्दिर सहित यहाँका जैविक विविधता तथा धार्मिक क्षेत्रको संरक्षण तथा विकासमा खर्च गरिने गाउँपालिका अध्यक्ष प्रकाश तिवारीले जानकारी दिनुभयो ।
पालिकालाई हिन्दु धर्मावलम्बीको केन्द्र बनाउने लक्ष्य सहित नयाँ धार्मिक गन्तव्यको रुपमा विकास भइरहेको मन्दिरमा नवग्रह अन्र्तगत नौवटा भुजा रहने छ । १३ फिटको उचाइको पिल्लरमा नवग्रहका नौवटै मूर्ति रहनेछन् भने त्यसमाथि १४ फिटको उचाइमा रहने पिल्लरमा चतुर्भुज आकारको सूर्यतर्फ फर्केको ग्रहको प्रतिमा रहने बताइएको छ । मन्दिर परिसर भित्र बन्ने षट्कोण र त्यसको पनि बीचमा पशुपतिनाथका जस्तै पञ्चमूखी शिवलिङ्ग राखिनेछ ।
शिवलिङ्ग ७ क्वीण्टलको राखिने भएको छ । नौवटा सर्कल रहने मन्दिरको माथिबाट घुम्न थालेपछि पुछारमा रहने सुरुङको बाटोबाट बाहिर निस्कन मिल्ने गरि निर्माण गरिदैछ । निर्माणकार्य सकिएपछि मन्दिरमा गणेश, कूलदेवता, इष्टदेवता, लक्ष्मी, दुर्गा, कालभैरव, हनुमान लगायतको पूजा गरेपछि नवग्रहको पूजा हुनेछ ।
हरेक वर्ष गणेश चतुर्थीको दिनमा मात्र सौर्यमण्डालीय ग्रहको प्रतिमा हेर्न पाइनेछ भने प्रत्येक साताको शनिबारमात्र यो मन्दिर दर्शन तथा नवग्रहको विधिवत पूजा गर्न पाइनेछ । निर्माणकार्य अन्तिम चरणमा पुगेको र यस मन्दिरको अनुष्ठान कार्यक्रम फागुन ६ देखि १४ गतेसम्म रहने पालिकाले जनाएको छ ।