स्याङ्जा १३ मंसिर । अर्जुनचौपारी गाउँपालिका–१ मा रहेको पञ्च कन्या माध्यमिक विद्यालयमा ३२२ जना विद्यार्थीलाई विद्यालय पोशाक वितरण गरिएको छ । विद्यालयमा अध्ययन गरेका २०६५ सालको एसएलसी ब्याचका पूर्व विद्यार्थीहरूले विद्यालय पोशाक वितरण गरेका हुन् ।
देश तथा विदेशमा रहेका २०६५ सालको एसएलसी ब्याचका ८४ मध्ये ४२ जना पूर्व विद्यार्थीहरूले संकलन गरेको २ लाख ४१ हजार पाँच सय रुपैयाँ बराबरको पोशाक वितरण गरिएको हो ।
यहाँ कक्षा नर्सरी देखि कक्षा नौ सम्मका सबै विद्यार्थीलाई पोशाक वितरण गरिएको र अब कक्षा १०, ११ र १२ का कमजोर विद्यार्थीलाई पोशाक वितरण गरिएको पूर्व विद्यार्थी एवं शिक्षक सुरेन्द्र काफ्लेले जानकारी दिनुभयो ।
आफू पढ्दाको अनुभव सम्झदै बढो दुख गरेको बताउदै पुर्व विद्यार्थी प्रमोद लम्सालले विद्यार्थीहरूको पोशाकमा नियमितता हुनु शिक्षा र अनुशासन दुवैका लागि महत्वपूर्ण भएको बताउनुभयो । उहाले आर्थिक दृष्टिले कमजोर वर्गका विद्यार्थीका लागि यस किसिमको सहयोग ठूलो राहतको रूपमा रहेको बताउनृुभयो ।
पोशाक वितरणमा गाउँपालिका उपाध्यक्ष सपना गुरुङले यस्ता सकारात्कम काममा पालिकाको सहयोग रहने बताउदै सबैको चाँसो जानुपर्ने बताउनुभयो ।
कार्यक्रममा विद्यालय ब्यवस्थापन समितिका अध्यक्ष मोहनबहादुर अधिकारीले विद्यार्थीको कार्यक्रमले विद्यालयसँग पूर्व विद्यार्थीको सम्बन्धलाई बलियो बनाउने अवसर प्रदान गरेको र अब प्रत्येक पूर्व विद्यार्थीसँग विद्यालय एकाकार हुने बताउनुभयो ।
कार्यक्रममा प्रधानाध्यापक जितबहादुर थापा, शिक्षक शोभाकान्त पौडेलले आ आफ्नो धारणा सहित सहयोगी पूर्वबिद्यार्थीलाई धन्यवाद ब्यक्त गर्नुभएको थियो ।