स्याङ्जा २ कात्तिक । ‘समृद्ध स्याङ्जाको लागि विश्व अभियान’ भन्ने मुल नारा सहित स्याङ्जा सहयोग समाज ( अन्तर्राष्ट्रिय समन्वय समिती ) द्वारा वालिङ् खेलमैदानमा आज (शुक्रवार) देखि पुरुष भलिवल प्रतियोगिता सुरु भएको छ ।
प्रतियोगिताको उदघाटन गर्दै गण्डकी प्रदेश सांसद एवं लेखा समिति संयोजक भोजराज अर्यालले खेलकूदका गतिबिधि संचालन गर्नु पर्नेमा जोड दिनुभयो । खेलकूदका माध्यमबाट समाज तथा देशको विकास गर्न सकिने बताउनुभयो ।
कार्यक्रममा सांसद कल्पना तिवारी, पूर्व सांसद मोहन रेग्मी, पुतलीबजार नगरप्रमुख तुलसीराम रेग्मी, कालीगण्डकी गाउपालिका अध्यक्ष खिमबहादुर थापा लगायतले शुभकामना मन्तब्य ब्यक्त गर्नुभएको थियो ।
यसैगरी, उदघाटन खेलमा पुतलीबजार र विरुवाले स्याङ्जा आईसीसी प्रथम भलिबल कप २०२४÷२०८१ लिगमा विजयी सुरुवात गरेको छन् । प्रतियोगिताको पहिलो खेलमा पुतलीबजारले वालिङ्लाई २–१ को सेटमा पराजित गर्दै विजयी सुरुवात गरेको हो । पुतलीबजारले वालिङ्माथी २२–२५, २५–२३ र २५–१५ को अङकले जित निकालेको हो । उक्त प्रतियोगिताको म्यान अफ द म्याच पुतलीबजारका सन्जु विक्रम शाह घोषित गरिएको छ ।
यस्तै, दोस्रो खेलमा विरुवाले अर्जुनचौपारीलाई २–० को सोझो सेटमा पराजित गर्दै विजयी सुरुवात गरेको हो । विरुवाले अर्जुनचौपारीमाथी २५–१९ र २५–१८ को अङकले सहज जित निकालेको हो । उक्त प्रतियोगिताको म्यान अफ द म्याच विरुवाका संजोग परियार हुनुभयो ।
लिग चरणपछि शीर्ष चारमा रहने टोली क्वाटर फाइनलमा प्रवेश गर्नेछन् भने प्रतियोगिता कार्तिक ५ गतेसम्म छ । प्रतियोगितामा प्रथम पुरस्कार नगद एक लाख ५० हजार, द्वृतिय पुरस्कार एक लाख, तृतीय ५० हजार र सान्त्वना २५ हजार रुपियाँ सहित कप, मेडल र प्रमाणपत्र रहेको छ ।
यसैगरी, प्रतियोगितामा प्रोत्साहन स्वरुप उत्कृष्ट खेलाडीलाई १० हजार र विभिन्न विधामा पाँच हजार रुपियाँको दरले पुरस्कृत गरिने छ । प्रतियोगितामा स्याङ्जाका ११ वटै पालिकाको सहभागिता रहेको स्याङ्जा सहयोग समाज अन्तर्राष्ट्रिय समन्वय समितीका अध्यक्ष विरेन्द्रजंग केसीले जानकारी दिनुभयो ।