स्याङ्जा ७ साउन । जबरजस्ती करणी कसुर मुद्धामा २ महिना २३ दिन कैद सजाए पाएका खुमाकुमारी दर्जीले कैदमा बस्नु पर्ने दिन बराबरको निर्धारण गरिएको रकम तिरेर घर फर्किएकी छन।
मुलुकी फौजदारी कार्यबिधि संहिता, २०७४ को दफा १५५ को सुबिधा उपयोग गरेर उनीले कैद सजाएबाट मुक्त पाएकी हुन । सो दफामा कैदबापत रकम तिर्न सकिने ब्यवस्था छ ।
सोही ब्यवस्था अनुरुप दर्जीले २४ हजार ९ सय रुपैंया तिरेर कैद बस्नु पर्ने सजाएबाट मुक्त पाएकी हुन। कैद सजाए मुक्त भएसंगै उनी आफनै घर फर्किएकी हुन। दैनिक ३ सयका दरले कैद बापतको रकम बुझाउनु पर्ने कानूनी प्रावधान छ ।
दफा अनुसार, ‘कुनै कसुरमा पहिलो पटक कसुरदार ठहरी एक बर्ष वा एक बर्षभन्दा कम कैदको सजाए भएको मुद्धामा कसुरदारको उमेर, कसुरको गम्भीरता, कसुर गरेको तरिका, आचरण समेतलाई बिचार गर्दा कारागारमा राख्न उपयुक्त नदेखिएमा तथा निजलाई छोडेदा सार्वजनिक शान्ति, ब्यवस्थामा खतरा पुग्नेसमेत नदेखिएमा त्यसको कारण खुलाई अदालतले निजलाई कैदमा राख्नुको सट्टा त्यस वापत रकम लिई कैदबाट छाडिदिन उपयुक्त ठहरयाएमा कैदवापतको रकम तिरी कैद बस्नु नपर्नेगरी आदेश दिन सक्नेछ ।’
करिब १५ महिनाअघि जबरजस्ती करणी कसुर मुद्दामा उनलाई २ महिना २३ दिनको कैद सजाए तोकिएको थियो। पुतलीबजार नगरपालिकाका ५४ वर्षीया दर्जीलाई अदालतले कैद तोकिएपछि फरार रहेको प्रहरीको भनाई छ ।