स्याङजा १४ मंसिर । स्याङ्जामा पहिलो पटक महिला मानवअधिकार रक्षकहरुको अन्तराष्ट्रिय दिवस मनाइएको छ । सामाजिक विकास कार्यालय स्याङ्जाको आयोजनामा लैङ्गिक हिंसा विरुद्धको १६ दिने अभियानको सन्दर्भ पारेर सो दिवस मनाइएको हो ।
जिल्लामा महिलाका अवस्था, मानवअधिकारकर्मीका काम, कर्तब्य अधिकार, चुनौती र आवश्यकताका बारेमा अन्र्तक्रिया गरिएको थियो ।
कार्यक्रममा बोल्दै पुतलीबजार नगरउपप्रमुख देवी अर्यालले महिला हिंसाको अन्त्य गर्न महिला मानवअधिकारकर्मीहरुको महत्वपूर्ण भूमिका हुने बताउनु भयो । उहाँले अझैंपनि समाजमा महिलामाथि शारिरिक र मानसिक हिंसा हुनुको साथै सामाजिक तथा साँस्कृतिक रुपले विभेद कायम रहेको बताउनुभयो ।
महिला मानवअधिकार कर्मीले नै महिलाको पिडा बुझ्ने भएकोले लैंगिक हिंसाको अन्त्यको लागि सबै महिला मानवअधिकारकर्मीसँग स्थानीय सरकार हातेमालो गर्न तयार रहेको उहाले भन्नुभयो ।
कार्यक्रममा बोल्दै महिला मानवअधिकार रक्षकहरुले समाजका कुरीति विरुद्ध आवाज उठाउँदा विभिन्न आरोप लाग्ने गरेको, महिलालाई हेर्ने दृष्टिकोण अझै सकरात्मक ढंगबाट परिवर्तन नभएको र राज्यले महिला अधिकार कर्मीलाई उपेक्षा गरेको बताउनुभयो ।
सामाजिक विकास कार्यालय स्याङ्जाका कार्यालय प्रमुख जीवन पौडेलले लैंङ्गिक हिंसा विरुद्धको १६ दिने अभियानमा मात्रै नभएर अन्य बेलामा समेत महिला मानवअधिकार रक्षकले राष्ट्रहित, लोकतन्त्र एवं सामाजिक रुपान्तरणका लागि गरेको योगदान, संघर्ष प्रति उच्च सम्मान गर्दै आगामी दिनहरुका महिला मानवअधिकार रक्षकको क्षमता विकासका लागि थप कार्यक्रमहरु गर्ने प्रतिवद्धता व्यक्त गर्नु भयो ।
प्रत्येक वर्ष नोभेम्बर २९ तारिखका दिनमा महिला मानवअधिकार रक्षकको अन्तराष्ट्रिय दिवस मनाइने गरेकोमा स्याङ्जामा पहिलो पटक लैङ्गिक हिंसा विरुद्धको १६ दिने अभियानको अवसर पारेर सामाजिक विकास कार्यालयले सो कार्यक्रमको आयोजना गरेको हो ।
महिला मानव अधिकार रक्षकहरुको जिल्ला संजाल स्याङ्जाका उपाध्यक्ष मखमली श्रेष्ठको अध्यक्षतामा सम्पन्न कार्यक्रमको संचालन कार्यालयका प्रशिक्षक अधिकृत दोर्णप्रसाद पनेरुले गर्नुभएको थियो । कार्यक्रममा महिला मानवअधिकार रक्षकहरुको जिल्ला संजाल स्याङ्जाका पदाधिकारी सहित सदस्यहरुको उपस्थिति रहेको थियो ।