स्याङ्जा १ कात्तिक । वालिङ् नगरपालिका स्थित एक सामुदायिक विद्यालयमा पढ्दै कमाउँदै कार्यक्रम कार्यान्वयन गरिएको छ । वालिङ नगरपालिका १० फूलबारीमा स्थित पूर्णामृत भवानी माध्यमिक विद्यालय र वालिङ १० भकुण्डेमा रहेको न्यू गाउँबेशी बहुउद्देश्यीय सहकारी संस्थाको सहकार्यमा नर्सरी स्थापना गरी विरुवा उत्पादन गरिएको छ ।
सहकारीले नर्सरी बनाई विभिन्न जातका बिरुवा उत्पादनका लागि आर्थिक सहयोग सहित बजारीकरणको जिम्मेवारी लिएको सहकारीका अध्यक्ष अर्जुनप्रसाद खनालले बताउनुभयो । सहकारीले नाफाका लागि मात्र नभई सीप सहित आय आर्जनसँग जोड्नकालागि उत्प्रेरणा प्रदान गर्न बिद्यालयसंग सहकार्य गरेको उहाको भनाई छ । उत्पादन भने विद्यालय र विद्यार्थीले नै गर्नुपर्ने छ ।
बिद्यालयमा मौसमी तथा बेमौसमी तरकारीका र फलफूलका बिरुवा सहकारीले बजारीकरण गर्दै आएको छ । बिक्री भएको मध्ये नाफाको ७० प्रतिशत विद्यार्थीलाई र ३० प्रतिशत सहकारी र विद्यालयलाई उपलब्ध गराईने अध्यक्ष खनालको भनाई छ ।
विद्यार्थीले विद्यालयमा सिकेको सीपलाई घरमा पनि उपयोग गर्दै ब्यावसायिक बन्न सहयोगी हुने विश्वास लिएको जनाउदै यस्तो अभ्यास संभवत जिल्लामै पहिलो भएको उहाले बताउनुभयो ।
विद्यालयमा सञ्चालित बाली विज्ञान कक्षामा अध्ययनरत कक्षा ९ का विद्यार्थी तथा प्राविधिक शिक्षकहरुको सहजीकरणमा बिरुर्वा उत्पादन गरिएको विद्यालयका प्रधानाध्यापक दीपक लम्सालले जानकारी दिनुभयो ।
“कृषिमा आधुनिक प्रविधिको प्रयोग मार्फत विद्यालय परिसरमै नर्सरी स्थापनागरी मौसमी तथा बेमौसमी तरकारी तथा फलफूलका बिरुवाहरु उत्पादन गर्न थालेका छौं” उहाले थप्नुभयो, “विद्यालयमा सैद्धान्तिक ज्ञानसँगै प्रयोगात्मक ज्ञान सिक्ने र त्यसलाई घर तथा समुदायमा पनि प्रयोगमा ल्याई उद्यमशीलताको विकास गर्नमा सहयोग पुग्ने अपेक्षा छ ।”
विद्यार्थीले काउली, ब्रोकाउली, बन्दा लगायतका बेर्ना उत्पादन गरेका छन् । आगामी दिनमा यसलाई निरन्तरता दिंदै च्याउ तथा अन्य नगदेबालीका कार्यक्रमहरु विस्तार गर्ने तयारीमा रहेको बिद्यालयले जनाएको छ ।
पहिलो चरणमा यसै शैक्षिक सत्रबाट सुरु भएको नर्सरीलाई आगामी दिनहरुमा थप ब्यवस्थित गरी विस्तारगर्दे अघि बढाईने प्रअ लम्सालको भनाई छ ।