स्याङजा २९ असार । क्रिकेटर सन्दीप लामिछानेको जन्मस्थान स्याङ्जाको आरुचौरमा क्रिकेट खेलमैदान बनाउन सुरू गरिएको छ । निर्माणाधीन खेल मैदानलाई ‘नाइन्टिन ओ सेभेन अरिना’ नाम दिइएको छ ।
अर्जुनचौपारी गाउँपालिका –५ आरुचौरमा जन्मिएका क्रिकेटर लामिछाने र उनको क्रिकेट खेलप्रति सम्मान गर्दै सोही वडाको थाप्लेमा गाउँपालिकाले क्रिकेट खेलमैदान बनाउन सुरू गरिएको हो ।
खेलमैदान निर्माणमा गाउँपालिकाको लगानी सहित स्थानीयबासीको जनश्रमदान रहेको छ । समुन्द्र सतहदेखी झण्डै २ हजार मीटर उचाईको समथर भूभागमा क्रिकेट मैदान बन्ने भएको छ। जुन यसअघि सार्वजनिक गौचरनका रुपमा प्रयोग हुदै आएको थियो ।
खेलमैदानको बीच भागबाट चारैतिर ४५ मिटर वृत्ताकारमा फैलिएको छ। राष्ट्रियस्तरको खेलमैदानका लागि आवश्यक पर्ने मापदण्डलाई ध्यान दिदै निर्माण कार्यमा जुटेको गाउँपालिकाका अध्यक्ष प्रकाश तिवारीले जानकारी दिनुभयो ।
क्रिकेट खेलाडीका प्रतिभा पहिचान गर्नुका साथै खेलाडी उत्पादनमा समेत महत्वपूर्ण भूमिका रहने विश्वास लिइएको छ । देश तथा विदेशमा आफनो र नेपालको नाम चिनाउन सफल क्रिकेटर सन्दीपको जन्म यसै ठाउँमा भएकाले पनि क्रिकेट मैदान बनाउन थालिएको हो। बर्षा सकिएसंगै खेलमैदानलाई पूर्णता दिनेछौं उहाले बताउनुभयो ।
क्रिकेट मैदान निर्माण सम्पन्न भएसँगै यस ठाउँमा राष्ट्रियस्तरको क्रिकेट प्रतियोगिता सञ्चालन गर्ने योजना अध्यक्ष तिवारीले सुनाउनुभयो । जुन पर्यटकीय स्थल पनि हो। थाप्लेमा एशियाकै ठूलो बुद्ध मूर्ति छ भने करिब आधा घण्टाको दुरीमा एशियाकै नमूना गाउँ शिरुवारी पनि पर्दछ ।
नेपाली राष्ट्रिय क्रिकेट टिमका पूर्वकप्तान समेत रहेका लामिछानेको योगदान र क्षमताको कदर गर्दै आउदा पिढींका लागि उत्प्रेरणा जगाउने उदेश्यले खेलमैदानको परिकल्पना गरिएको छ । खेलसंगै पर्यटनलाई पनि संगसंगै जोडेर अघि बढाउन सकिने उपाध्यक्ष सपना गुरुङ्को भनाई छ ।
यसैगरी, अर्जुनचौपारी गाउँपालिकाले स्थानीय पाठयक्रममा पनि क्रिकेटर लामिछानेको जीवनी बारे समावेश गरेको छ ।
