स्याङ्जा १२ असोज । पुतलीबजार नगरपालिका ३ मा स्थित शिशु निकेतन अग्रेजी बिद्यालय प्रांगणमा शनिवार नसर्ने रोग सम्बन्धी शिविर गरिएको छ ।
पुतलीबजार नगरपालिकाको सहकार्यमा जिल्ला अस्पतालको प्राबिधिक सहयोग र स्वास्थ्य निर्देशनालयको आयोजनामा स्वास्थ्य शिविर गरिएको हो ।
शिविरको उदघाटन गर्दै नगरप्रमुख तुलसीराम रेग्मीले नगरबासीको स्वास्थ्य सेवा प्रवाहलाई पहिलो प्राथमिकतामा राखेको बताउनुभयो । उहाले जिल्ला सदरमुकामसंगै रहेको पुतलीबजार सहित जिल्ला अस्पताल र स्वास्थ्य कार्यालयले उत्कृष्ठ नतिजा ल्याउनु हाम्रोलागि सुखद पक्ष रहेकोमा जोड दिनुभयो । रगत र पिसाबबाटै धेरै रोग पत्ता लगाउन सकिने भएपछि रगत र पिसाव परिक्षण गरिएको प्रमुख रेग्मीले भन्नुभयो ।
नगरपालिकाले यसअघि पनि बृहत आखा शिविर, मुटु लगायत अन्य रोग र क्यान्सर लगायत पालिका स्तरीय बृहत स्वास्थ्य शिविर संचालन गरि औषधोपचार र शल्यक्रियाका ब्यवस्थापनमा सहयोग गरेको जानकारी गराउनुभयो ।
कार्यक्रममा स्वास्थ्य निर्देशनालयका डा. रोशन ढाकाल, डा. रमेश केसी, स्वास्थ्य कार्यालय प्रमुख केशवप्रसाद चापागाई, अस्पताल प्रमुख डा सुशिल मरासीनी लगायतले शुभकामना मन्तब्य ब्यक्त गर्नुभएको थियो । वडा सदस्य अमिरवक्स मियाको अध्यक्षतामा सम्पन्न कार्यक्रमको संचालन पुतलीबजार स्वास्थ्य शाखा प्रमुख अनिषा सुवेदीले गर्नुभएको थियो ।
शिविरमा वडा नं. ३ का २३१ जनाको रगत तथा पिसाबको नमुना संकलन गरिएको थियो । संकलित रगतको नमुनाको स्याङ्जा अस्पतालको प्रयोगशालामा परिक्षणगरी परिक्षणको रिपोर्ट आइतवार १० बजेदेखि जानकारी गराईने भएको छ ।