स्याङ्जा १५ चैत । सामाजिक विकास कार्यालय स्याङ्जाको आयोजना तथा पुतलीबजार नगरपालिका र बाडखोला मुस्लिम समाजको समन्वयमा जारी १० दिने लाछा डोरी बनाउने तालिम सम्पन्न भएको छ ।
पुतलीबजार नगरपालिका ३ स्थित मर्दसामा मुस्लिम महिलाहरुलाई लक्षित गर्दै सो तालिम दिइएको हो । तालिमको शुक्रवार समापन गर्दै नगरप्रमुख तुलसीराम रेग्मीले पुख्र्यौली पेशाको संरक्षण र प्रवद्र्धन गर्दै सहभागी महिलालाई उद्यमी बन्न सुझाव दिनुभयो । तालिमलाई उपयोग गर्दै थप सिप विकासका लागि नगरपालिकाले पनि आवश्यक सहयोग गर्ने नगरप्रमुख रेग्मीले बताउनुभयो ।
उहाले मुस्लिम समुदायको हित र अधिकारका पक्षमा सधैभरी सकरात्मक भएको जनाउदै सामाग्री चोकदेखि ईन्द्रेश हुदै गणेशमान मार्ग निर्माणका लागि प्रदेश र संघ सरकारसंग समन्वय गरिरहेको जानकारी गराउनुभयो ।
सामाजिक विकास कार्यालय प्रमुख जीवन पौडेलले आउदा दिनमा पनि यस्ता तालिम उपलब्ध गराउने प्रतिबद्धता जनाउनुभयो ।
कार्यक्रममा पुतलीबजार नगरपालिका ३ का सदस्य द्धय हाजि अमिरबक्स मिया र सोमबहादुर कुँबर, नेपाल मुस्लिम संघ गण्डकी प्रदेशका अध्यक्ष हाजी शा मोहम्मद मिया, इस्तिहाज संगठन गण्डकी प्रदेश अध्यक्ष हाजि शेरअली मिया, बाडखोला मुस्लिम समाजका पूर्वअध्यक्ष शैसुद्धिन मिया, बाडखोला युवा क्लवका अध्यक्ष आयुब मिया, प्रशिक्षक समिबा बानु लगायतले तालिमले मुस्लिम समुदायमा सकारात्मक प्रभाव पारेको जनाउदै जनचेतना तथा सीपमूलक तालिम उपलब्ध गराउन माग गर्नुभएको थियो ।
मु्स्लिम समाजका बाडखोलाका बरिष्ठ उपाध्यक्ष शा खालिद मियाको अध्यक्षतामा सम्पन्न कार्यक्रममा सहसचिव अमिर आलमले स्वागत र सचिव हाजि अली मोहम्मदले संचालन गर्नुभएको थियो ।
तालिममा २० जना मुस्लिम समुदायका महिलाहरुको सहभागिता थियो । सिकान्तकृत नागरिकलाई सचेतना सँगै आर्थिक सशक्तीकरणकालागि दिइएको सो तालिम नुरी इस्लामिक मदरसा प्राङ्गण वाडखोलामा गरिएको थियो ।