स्याङ्जा १६ कात्तिक । मुक्तिनाथ विकास बैंक लिमीटेडको वार्षिक साधारणसभाबाट सञ्चालक समितिबाट प्रस्तावित लाभांश पारित भएको छ ।
शनिवार पोखरामा आयोजित १९ औं वार्षिक साधारणसभाले आ.व. २०८०÷०८१ को वार्षिक प्रतिवेदनसँगै सेयरधनीहरुलाई १८ दशमलब २० प्रतिशत लाभांश दिने प्रस्ताव स्वीकृत गरेको हो । पारित लाभांशमध्ये १३ दशमलब ५३ प्रतिशत बोनस सेयर र बाँकी ४ दशमलब ६७ प्रतिशत लागि नगद लाभांस (बोनस सेयर र नगद लाभांसको कर सहित) रहेको छ ।
बैंकका सञ्चालक समितिका अध्यक्ष खिमप्रकाश मल्लको अध्यक्षतामा सम्पन्न उक्त कार्यक्रममा विशेष प्रस्तावहरुको रुपमा यस विकास बैंककोे चुक्तापूँजी अक्षेरेपी ९ अर्ब ३ लाख ८८ हजार ७६७ रुपैयाँ पुर्याउने निर्णय भएको छ । प्रबन्धपत्रको सम्बन्धित दफा संशोधन गर्ने र पूँजीवृद्धि पश्चात नेपाल राष्ट्र बैंकले तोकेको प्रावधान अनुसार यस विकास बैंकलाई वाणिज्य बैंकमा स्तरोन्नतिको लागि आवश्यक प्रक्रिया अगाडि बढाउन सञ्चालक समितिलाई अख्तियारी प्रत्यायोजन गर्ने प्रस्तावहरु समेत स्वीकृत गरेको छ ।
सभाबाट आ.व. २०८२÷०८३ को लागि लेखापरीक्षकको नियुक्ति लगायतका प्रस्तावहरु पारित गरेको छ । साधारणसभाको औपचारिक कार्यक्रमको समुद्घाटन सञ्चालक समितिका अध्यक्ष खिमप्रकाश मल्लले गर्नुभएको थियो । सभामा बैंकका सञ्चालक समितिका सदस्य भरतप्रसाद लम्सालले स्वागत र बैंकका प्रमुख कार्यकारी अधिकृत प्रद्युमन पोखरेलले बैंकको हालको अवस्था र भावी रणनीतिको बारेमा जानकारी गराउनु भएको थियो ।