स्याङजा १३ असोज । सरकारका नवनियुक्त मुख्य सचिव एकनारायण अर्याललाई स्याङ्जामा बधाई एवं सम्मान गरिएको छ । जिल्ला समन्वय समिति स्याङ्जाको आयोजना तथा जिल्ला प्रशासन कार्यालय, जिल्ला स्थित ११ वटै स्थानीय पालिका र वालिङ् उद्योग वाणिज्य संघको ब्यवस्थापन तथा सहयोगमा ती कार्यक्रम गरिएका हुन ।
सम्मान एवं बधाई कार्यक्रममा बोल्दै मुख्यसचिव अर्यालले सिद्धार्थ राजमार्ग विस्तारको आयोजना अत्यावश्यक रहेको बताउनुभयो । उहाले पोखरा सुनौली सिद्धार्थ राजमार्ग विस्तारका लागि मन्त्रीस्तरमा कुरा भैसकेको जानकारी गराउनुभयो ।
नेपाल सरकारका नवनियुक्त मुख्य सचिव अर्यालले सिद्धार्थ राजमार्ग विस्तारका लागि अर्थमन्त्री र गृहमन्त्रीसँग कुरा भैसकेको बताउनुभयो । दुबै मन्त्रीले पनि सिद्धार्थ राजमार्ग विस्तार गर्नुपर्छ भन्ने आफूलाई लागेको बताउनु भएको उहाँले उल्लेख गर्नुभयो । यसका लागि आउदो बजेट निर्माण हुने क्रममा मेरो तर्फबाट पहल गर्नेछु भन्नुभयो ।
यो सडक विस्तारले स्याङ्जा जिल्लाको लागि मात्र नभएर पोखरा र लुम्विनीसँग जोड्ने भएकाले देशकै लागि ठूलो महत्व राख्दछ । जिम्मेवारीका हिसाबले देशको समग्र विकास हेर्नुपर्छ तर पनि आफ्नो जिल्लाको लागि भावनात्मक हिसाबले पनि प्राथमिकता दिनुपर्ने स्वभाविक हुन आउँछ । यसमा म पूर्ण जिम्मेवारीका साथ लाग्ने विश्वास व्यक्त गर्दछु, मुख्य सचिव अर्यालले बताउनुभयो ।
यसैगरी आँधिखोला करिडोर मार्फत पर्यटन विकास गर्ने, ज्याग्दी करिडोर निर्माणलगाएतका विषय पनि उत्तिकै महत्वपूर्ण छन् । यसलाई पनि आँफूले राष्ट्रिय योजना आयोगमा छलफलको विषय बनाईरहेको उल्लेख गर्दै मुख्य सचिव अर्यालले सकारात्मक पहल गर्ने विश्वास व्यक्त गर्नुभयो ।
यस्तै गरेर आवस्यकता र समय सापेक्ष विस्तारका लागि स्वास्थ्य, शिक्षा, कृषिका क्षेत्रको प्रवद्र्धनमा पनि आफ्नो ध्यान जाने उहाँको भनाई छ । विकासको काममा राजनीति गर्नुहुँदैन, साझा धारणा राखेर गर्नुपर्छ । स्थानीयतहहरुमा सोही अनुसार काम हुने विश्वास लिएको मुख्य सचिव अर्यालले व्यक्त गर्नुभयो ।
कार्यक्रममा वालिङ ११ सुर्कौंदीस्थित ईलाका प्रशासन कार्यालयका लागि जग्गा प्रदान गर्ने दाताहरुलाई फूलमाला र दोसल्ला ओडाएर मुख्य सचिवज्यूबाट सम्मान गरिएको छ ।
वालिङ ११ सुर्कौंदीका ध्रुवराज शर्मा÷कपिलदेव शर्मा, विष्णुप्रसाद पंगेनी÷यामकुमारी पंगेनी र खड्ककुमारी खाँणलाई सम्मान गरिएको हो । यसैगरी पालिकाहरु र संघ संस्थाहरुको तर्फबाट मुख्य सचिवलाई बधाई एवम सम्मान गरिएको थियो ।
यस अघि जिल्लाका राजनीतिक दलका प्रतिनिधी, जिल्लाका ५ नगरपालिका र ६ गाउँपालिकागरी ११ वटै पालिका प्रमुख, अध्यक्ष एवं उपप्रमुख, उपाध्यक्ष लगाएत जनप्रतिनिधी, नागरिक समाज, निजी संस्थाका प्रतिनिधी एवम् सञ्चारकर्मीहरुबीच समग्र जिल्लाका विषयमा छलफल गरिएको थियो ।
छलफलमा जिल्लाको वृहत्तर विकासका सन्दर्भमा सहभागीहरुले प्रतिनिधीमूलकरुपमा आ—आफ्ना तर्फबाट धारणा राखिएको थियो । योसँगै जिल्लाका ११ वटै पालिकाको निर्णय अनुसार तयार पारिएको ज्ञापनपत्र जिल्ला समन्वय समिति प्रमुख श्रीप्रसाद जिटीले मुख्य सचिव अर्याललाई हस्तान्तरण गर्नुभएको थियो ।
सडक स्तरोन्नति तथा पूर्वाधार, शिक्षा, स्वास्थ्य, पर्यटन विकास लगाएतका समस्याका सन्दर्भमा ध्यानकर्षण सहितको ज्ञापनपत्र जिल्ला समन्वय प्रमुख जिटीले बुझाउनु भएको हो ।
कार्यक्रम जिल्ला समन्वय समितिको आयोजना र स्थानीय पालिका सबैको सहआयोजनामा गरिएको हो । यसैगरी जिल्ला प्रशासन कार्यालय स्याङ्जाको व्यवस्थापन र वालिङ उद्योग वाणिज्य संघको सहयोग थियो ।
जिल्ला समन्वय समितिका अध्यक्ष श्रीप्रसाद घर्तिको अध्यक्षतामा सम्पन्न कार्यक्रमममा वालिङ नगरप्रमुख कृष्ण खाँणले स्वागत एवं शाखा अधिकृत संयोग भट्टराईले संचालन गर्नुभएको थियो ।
कार्यक्रममा प्रमुख जिल्ला अधिकारी सुनिता नेपालले मुख्यसचिवको परिचय सहित उहाका निजामति सेवा बारेमा जानकारी गराउनु भएको थियो ।