स्याङ्जा १० पुस । कालीगण्डकी गाउँपालिका –३ विर्घा–मिर्मीमा सडकखण्डमा ट्याक्टर दुर्घटना हुँदा एक जनाको मृत्यु भएको छ भने दुईजना घाइते भएका छन ।
आलमबाट बिर्घातर्फ जाँदै गरेको ट्रली नभएको सिरक–डसना बनाउने मेसिन जोडीएको लु ४ त ७८३१ नम्बरको टयाक्टर पक्की भित्री सडकखण्डमा मंगलबार साँझ करिब ८ दुर्घटनामा परेको जिल्ला प्रहरी कार्यालय स्याङ्जाले जनाएको छ ।
बारा — गढीमाई नगरपालिकाका अन्दाजी २२ वर्षीय सब्दुल अन्सारीको मृत्यु भएको प्रहरीले जनाएको छ। ट्याक्टरले च्यापिएका उनलाई उपचारका कालीगण्डकी अस्पताल लगिएपछि चिकित्सकले मृत घोषणा गरेको प्रहरी निरीक्षक उमेशलाल श्रेष्ठले जानकारी दिनुभयो ।
यसैगरी, बारा—कलैया उपमहानगरपालिकाका २४ वर्षीय अर्जुन शाह र बारा गढीमाई नगरपालिकाका २६ वर्षीय सलाम मुदिन मन्सुरी दुर्घटनामा परि घाइते भएको प्रहरीको भनाई छ।
घाइते दुवैको टाउका र शरिरका भागमा चोट लागेकोे छ। उनीहरूको थप उपचारका लागि लुम्बिनी मेडिकल कलेज प्रवास, पाल्पा पठाइएको छ। टयाक्टरमा सवार बारा गढीमाई का १४ वर्षीय सिकन्दर यादव भने सकुशल रहेको प्रहरीले जनाएको छ।
ट्याक्टर चालक गुल्मी कालीगण्डकी गाउँपालिकाका २६ वर्षीय सन्दिप वि.क. फरार रहेको र उनको खोजतलास भइरहेको प्रहरी निरीक्षक श्रेष्ठले जानकारी दिनुभयो ।