स्याङ्जा ८ चैत । सामाजिक तथा भौतिक विकासमा महिला जनप्रतिनिधिलाई प्रत्यक्ष सहभागिता गराउने उदेश्यले वालिङ्मा महिला जनप्रतिनिधिका क्षमता अभिबृद्धि सम्बन्धी प्रशिक्षण दिइएको छ ।
वालिङ नगरपालिकाको आयोजना तथा द एशिया फाउण्डेशन र दलित महिला केन्दको्र सहजीकरणमा वालिङ्का महिला जनप्रतिनिधिलाई प्रशिक्षण दिइएको हो ।
स्थानीय सरकार सञ्चालन तथा योजना तथा बजेट माग सहितको कार्यान्वयनमा महिलाको भूमिकालाई सशक्त बनाउने उदेश्यले वालिङमा प्रशिक्षण कार्यक्रम गरिएको हो । वालिङ नगर भित्रका महिला जनप्रतिनिधिलाई लक्षित गर्दै स्थानीय शासन, नीति तथा बजेट निर्माण र कार्यान्वयनका चरणबद्ध प्रक्रियाका बारेमा प्रशिक्षित गराइएको छ ।
कार्यक्रमको सहजिकरण गण्डकी प्रदेश सासंद कल्पना तिवारीले गर्नुभएको थियो । टोलदेखि कार्यपालिकासम्म आइपुग्दा बिभिन्न ७ चरण पुरा गरेर मात्र बजेट तथा योजना कार्यान्वयनको अवस्थामा पुग्ने जनाउदै यसतर्फ समयमै जानकार लिन समेत उहाले सुझाव दिनुभयो । उहाँले महिलामैत्री निति तथा योजना निर्माणमा समेत ध्यान पुरयाउन आग्रह गर्नुभयो ।
महिला नेतृत्व सशक्त र प्रभावकारी बनाउन यस्ता प्रशिक्षण आवश्यक रहने जनाउदै प्रक्रियागत र आवश्यकता बमोजिमका योजनामा बजेट ब्यवस्थापन गर्नुपर्ने बताउनुभयो । उहाँले स्थानीय, प्रदेश र संघ सरकारले गर्दै आएका बजेट तथा निती कार्यक्रमका बारेमा समेत जानकारी गराउनुभयो ।
सोही कार्यक्रममा वालिङ नगरउपप्रमुख कबिता तिवारीले महिलामैत्री बजेट तथा योजना निर्माणमा सहकार्य गर्दे अघि बढ्ने बताउनुभयो । महिला बर्गका हक, हित, अधिकार र आर्थिकोपार्जनमा ध्यान दिई सक्षम बनाउने आफनो लक्ष्य रहेको जनाउदै उपप्रमुख तिवारीले स्थानीय विकास र समृद्धिको लागि स्थानीय सरकारलाई जवाफदेही बनाउन महिलाहरु नै सक्षम बन्नुपर्नेमा जोड दिनुभयो ।
महिला जनप्रतिनिधिहरुले राजनीतिक, आर्थिक, सामाजिक र लैंगिक बिभेदलार्ई चिर्दै अघि बढ्नुपर्ने चुनौती रहेको उहाको भनाई छ । उहाँले महिलाहरुको सशक्त सहभागिता विना दिगो र समावेशी विकास सम्भव नरहेको बताउदै स्थानीय शासन र बजेट निर्माणमा महिलाहरुको प्रत्यक्ष भूमिका बनाउन यस्ता तालिमको महत्वपूर्ण रहेको बताउनुभयो । यस्ता कार्यक्रमले महिला जनप्रतिनिधिहरुको ज्ञान, सीप र नेतृत्व क्षमतामा वृद्धि गर्नुका साथै आर्थिक पारदर्शितामा समेत सहयोग पुग्नेमा जोड दिनुभयो ।
कार्यक्रममा वालिङ नगरपालिकाका प्रमुख प्रशासकीय अधिकृत गंगालाल सुवेदीले महिला तथा दलित जनप्रतिनिधिलाई बजेट निर्माण र प्रकृयाको बारेमा जानकारी भएमा महिला, बालबालिका तथा जेष्ठनागरिक सहित विपन्न तथा दलित समुदायको हक अधिकार सुनिश्चित हुने प्रमुख प्रशासकिय सुवेदीको भनाई छ ।
द एशिया फाउण्डेशन गण्डकी प्रदेशका संयोजक पूर्ण परियार र दलित महिला केन्द्र नेपालका कार्यक्रम अधिकृत रितेस विकले कार्यक्रमको उद्देश्य सहित थप सहजीकरण गर्नुभएको थियो । कार्यक्रममा वालिङ् नगरपालिकाका १४ वटा वडाका दलित महिला सहित २९ जना महिला जनप्रतिनिधिको सहभागिता थियो ।
सो प्रशिक्षण कार्यक्रमको सहजीकरण न्यायिक समिति शाखा सहजकर्ता सीता काफलेले गर्नुभएको थियो ।
