स्याङ्जा १९ असोज । मुलुकभर तीन दिनसम्म मध्यमदेखि भारी वर्षा हुने पूर्वानुमान जारी भएसँगै जिल्ला प्रशाासन कार्यालय, स्याङ्जाले लामो दूरीका सवारी साधनको आवतजावत नगर्न जिल्लाबासीसंग आग्रह गरेको छ ।
देशका विभिन्न स्थानमा असोज १८ देखि २० गतेसम्म भारी वर्षा र सम्भावित विपद्को चेतावनी जारी भएका अवगत गराउदेै सवारी आवागमनलाई बन्द गरेको जानकारी गराएको हो ।
जल तथा मौसम विज्ञान विभागको पूर्वानुमान अनुसार मध्यमदेखि अति भारी वर्षा हुने संभावना रहेकाले बाढी, पहिरो, डुबान लगायतका जोखिम उच्च हुने देखिएको जनाउदै जिल्ला सुरक्षा समितिको बैठकले सिद्धार्थ राजमार्ग लगायत सहायक मार्गमा सञ्चालन हुने सार्वजनिक यातायात, मालवाहक सवारी तथा अन्य लामो दूरीका साधन अत्यावश्यक संचालन नगर्न नगराउन प्रमुख जिल्ला अधिकारी ईश्वरीप्रसाद अर्यालद्धारा हस्ताक्षरित सूचनामा उल्लेख गरिएको छ ।
साथै, जोखिमयुक्त स्थानका बासिन्दालाई तत्काल सो स्थान छाडी सुरक्षित स्थानमा बस्न, अत्यावश्यक बाहेक यात्रा नगर्न, अत्यावश्यक सवारी साधन सञ्चालन गर्नै पर्ने अवस्था आएमा नजिकको सुरक्षा निकायसंग समन्वय गर्न समेत आग्रह गरिएको छ । यसैगगरी, राष्ट्रिय विपद् जोखिम न्यूनीकरण तथा व्यवस्थापन प्राधिकरणले समेत असोज १८, १९ र २० गते कोशी, मधेश, बागमती, गण्डकी र लुम्बिनी प्रदेशका सबै जिल्लाबाट चल्ने लामो दूरीका सवारीसाधन रोक्ने निर्णय सार्वजनिक गरिसकेको छ ।
स्थानीय प्रशासनले जोखिमयुक्त स्थानका बासिन्दालाई तत्काल सुरक्षित स्थलमा सार्न, अनावश्यक यात्रा नगर्न र सावधानी अपनाउन समेत आग्रह गरेकोे छ ।
