स्याङ्जा १८ मंसिर । लैंगिक हिंसा बिरुद्धको १६ दिने अभियान अन्र्तगत बिहीवार स्याङ्जा सदरमुकाममा सरोकारवालाबीच सचेतनामूलक कार्यक्रम सहित अन्र्तक्रिया गरिएको छ ।
‘प्रबिधिको सही प्रयोग गरौं, लैंगिक हिंसा अन्त्य गरौं’ भन्ने मूल नाराका साथ जारी अभियानलाई सामुदायिक बन उपभोक्ता महासंघ नेपाल जिल्ला महासंघ स्याङ्जा (फेकोफन) सरोकारवालाबीच ती कार्यक्रम गरेको हो ।
अन्र्तक्रियाको उदघाटन गर्दै गण्डकी प्रदेश सांसद एवं पूर्वमन्त्री सीता सुन्दासले अन्तर्राष्ट्रिय जगतमा ३ जना ल्याटिन अमेरिकी महिला र नेपालको हकमा योगमाया न्यौपाने, मंगलादेवी सिंह, साहना प्रधान, साधना प्रधान लगायतका धेरै महिला आमाहरुका साहस र प्रेरणाले आजको अवस्था आइपुगेको बताउनुभयो ।
उहाँहरुका सामाजिक सुधारका अभियानले महिला मुक्तिका लागि उठाएका आवाज बिश्वभर सहित नेपालमा पनि मनाउदै आएको उहाको भनाई छ । लैंगिक हिंसाका कारण कुनै पनि ब्यक्ति मात्र प्रभावित नभई सिंगो परिवार, समाज र राष्ट्रलाई नै नकरात्मक प्रभाव पार्ने बताउनुभयो ।
हिंसा गर्दिन र हिंसा सहन्न भन्ने बिचारलाई आत्मसाथ गर्दै अघि बढ्नु पर्नेमा उहाले जोड दिनुभयो । अझैं पनि धेरै विभेदका घटना घटीरहेको जनाउदै शिक्षा, चेतनाका माध्यमबाट न्यूनिकरण गर्दै सून्यसहनशीलता बिधि अपनाउन घरपरिवारका सदस्यलाई सिकाउन जरुरी रहेको बताउनुभयो । सोही कार्यक्रममा सांसद सुन्दासले लैंगिक हिंसा सम्बन्धी कार्यपत्र प्रस्तुत गर्नुभएको थियो ।
कार्यक्रममा पुतलीबजार नगरपालिकाका पूर्वप्रमुख सीमा क्षेत्री, सामुदायिक बन उपभोक्ता महासंघ नेपालका केन्द्रीय सदस्य दोबबहादुर कार्की, गण्डकी प्रदेश सदस्य उमाकान्त सुवेदी, महिला नेतृ कमला मरासिनी लगायतले बिगतका तुलनामा अहिले धेरै सकारात्मक परिवर्तन भएको जानकारी गराए । तर, पछिल्ला दिनमा प्रबिधिको सही प्रयोग गर्न नसक्दा नकरात्मक प्रभाव परेको जनाउदै सही उपयोग गर्नु पर्नेमा जोड दिनुभयो ।
सामुदायिक बन उपभोक्ता महासंघ नेपाल जिल्ला महासंघ स्याङ्जाका अध्यक्ष तारा शर्माको अध्यक्षतामा सम्पन्न कार्यक्रममा कोषाध्यक्ष तीलकुमारी रेग्मीले स्वागत र सचिव खगेन्द्र पौडेलले संचालन गर्नुभएको थियो ।