स्याङ्जा २९ माघ । सामाजिक विकास कार्यालय स्याङ्जाको आयोजना तथा जीवन वाटीका नेपालको समन्वयमा लागु औषध तथा कुलतको अन्त्यको लागि सचेतना एवं परामर्श प्रशिक्षण कार्यक्रम गरिएको छ ।
पुतलीबजार नगरपालिका ३ देवानचोक स्थित भूतपूर्व सैनिक आवासिय अंग्रेजी माध्यमिक बिद्यालयमा आयोजित कार्यक्रमको उदघाटन गर्दे पुतलीबजारका उपप्रमुख देवी अर्यालले भौतिक निर्माण संगसंगै सामाजिक क्षेत्रमा समेत बजेट बिनियोजन गर्नुपर्ने आवश्यकता देखिएको बताउनुभयो ।
उहाले आउदा दिनमा पनि सचेतना कार्यक्रमका क्षेत्रमा नगरपालिकाले बजेट उपलब्ध गराउने बताउनुभयो । बिद्यालय पढ्ने बेला भनेको अलि परिपक्व भइ नसक्ने उमेर भएकाले यस समयमा आफुलाई बढी सजगता अपनाउन सहभागी बिद्यार्थीलाई सुझाव दिनुभयो ।
किशोर अवस्था भनेको चञ्चले र जिज्ञासु हुने उमेर भएकाले पनि गलत बाटोमा फस्न सकिन्छ भनि सचेत रहन पनि उहाले भन्नुभयो । अमूल्य जीवनको महत्व बुझेर अभिभावक, गुरु र अग्रजका ज्ञान लिदै अघि बढ्न उपप्रमुख अर्यालले सुझाव दिनुभयो ।
सामाजिक विकास कार्यालय स्याङ्जाका सहायक प्रशासकिय अधिकृत दोर्ण पनेरुले बिद्यार्थीले उज्वल भविष्यको लक्ष्य सहित गलत कार्य नगर्न सुझाव दिनुभयो ।
सोही कार्यक्रममा जीवन बाटिका नेपाल स्याङ्जाका संस्थापक अध्यक्ष एवं प्रशिक्षक नविन अर्यालले लागु औषध सहित एचआइभी एड्स सम्बन्धी जानकारी सहित यसबाट प्रभावितका अवस्थाका बारेमा प्रशिक्षण दिनुभएको थियो ।
यसैगरी, प्रहरी नायब निरीक्षक यमनाथ बगालेले लागु औषध सम्बन्धी बिद्यमान कानूनी प्रावधान र सजाएका बारेमा जानकारी गराउनुभएको थियो ।
बिद्यालय ब्यवस्थापन समितिका अध्यक्ष सुवेदार किसनबहादुर प्रधानको अध्यक्षतामा सम्पन्न कार्यक्रमको संचालन भाइस प्रिन्सिपल जीवन ढकालले गर्नुभएको थियो ।
सचेतना कार्यक्रममा भूपू बिद्यालयको कक्षा ८, ९, १० मा अध्ययरत बिद्यार्थी, बिद्यालय संचालक, शिक्षक, बिद्यालयको सवारी साधन चालक लगायतकाृ सहभागिता थियो ।
