स्याङ्जा २४ असार । कृषि ज्ञान केन्द्र स्याङ्जाले जिल्लाका ४ उत्कृष्ठ किसानलाई कृषि पुरस्कार सहित मंगलबार सम्मान गरेको छ ।
सम्मान पाउनेमा भीरकोट नगरपालिकाका मौरी पालक किसान श्यामप्रसाद अर्याल, गल्याङ् नगरपालिकाका बीउ उत्पादक किसान चन्द्रकान्त डुम्रे, वालिङ् नगरपालिकाका तरकारी उत्पादक किसान हुमनाथ लामिछाने र पुतलीबजार नगरपालिकाका सुन्तला किसान रामबन्धु अर्याल रहनुभएको छ ।
न्यूनतम २० बर्षदेखि ३० बर्षसम्म निरन्तर कृषि पेशामा आवद्ध रहेका उनीहरु सबै ब्यावसायिक किसान हुनुहुन्छ । बर्षेनी उहाहरुले ५÷७ देखि ३० लाखसम्म आम्दानी गर्दै आएको सोही कार्यक्रम मार्फत जानकारी गराउनुभयो ।
प्रमुख जिल्ला अधिकारी ईश्वरीप्रसाद अर्याल, वरिष्ठ कृषि विकास अधिकृत विनोद हमाल, प्रहरी उपरीक्षक दधिराम न्यौपानेले जनही १०÷१० हजार नगद सहित दोसल्ला ओढाई सम्मानपत्रद्धारा सम्मान गर्नुभएको थियो ।
सम्मान कार्यक्रममा बोल्दै प्रजिअ अर्यालले पहिला खानका लागि गरिने कृषि हाल ब्यवासायिक बनेको बताउनुभयो । स्याङ्जा अन्न, तरकारी र फलफूलका लागि उपयुक्त भएकाले कृषि मार्फत उद्यम र आयआर्जन बढाउन सकिने र रोजगारकै निम्ति विदेशिन नपर्ने उहाको भनाई छ ।
किसान बिनाको भविष्य कल्पना पनि गर्न नसकिने जनाउदै कृषिलाई प्राथमिकतामा राख्नु पर्नेमा जोड दिनुभयो । रैथाने बाली संरक्षण गर्दै हाइव्रेड तथा आधुनिक कृषि प्रणालीलाई अवलम्बन गर्न सुझाव दिनुभयो । कृषिमा भैरहेको राज्यको अनुदानको सहिसदुपयोग गर्दै आत्मनिर्भर बन्न आग्रह गर्दै आधुनिकता र यान्त्रिकरणको विकाससंगै मुलुकले फडको मारेको बताउनुभयो ।
सुन्तला सुपरजोन परियोजना संचालन समितिका अध्यक्ष बोधराज अर्याल, सम्मानित हुनुहुने किसान श्यामप्रसाद अर्याल, चन्द्रकान्त डुम्रे, हुमनाथ लामिछाने, रामबन्धु रेग्मीले आ आफना कृषि कर्मका बारेमा जानकारी गराउदै कृषि पेशामै आफुहरु सन्तुष्ट रहेको बताउनुभयो । जिल्लाको कृषिको अवस्थाका बारेमा जानकारी गराउदै कृषिप्रति राज्यको लगानी न्यून भएको कारण धेरैको कृषिमा आर्कषण बढ्न नसकेको गुनासा पनि सुनाउनुभयो ।
कृषि ज्ञान केन्द्रका प्रमुख हमालको अध्यक्षतामा सम्पन्न कार्यक्रममा कृषि बिज्ञ नारायणप्रसाद पाठकले स्वागत र बाली संरक्षण अधिकृत प्रतिमा कुँबरले संचालन गर्नुभएको थियो ।
केन्द्र प्रमुख बिनोद हमालको संयोजकत्वमा भेटेरिनरी डा. रुपेश श्रेष्ठ र वरिष्ट कुषि विकास अधिकृत अजय अधिकारी सदस्य रहनेगरि उत्कृष्ठ किसान छनौट समिति गठनगरि सोही समिति मार्फत किसान छनौट गरिएको कृषि ज्ञान केन्द्रले जनाएको छ ।
