स्याङ्जा ११ जेठ । पुतलीबजार नगरपालिका ८ बहाकोटमा आइतवार ७५ औं क्रान्ति क्रान्ति दिवस मनाइएको छ ।
बहाकोट भन्ज्याङ्मा भएको आक्रमण बिरुद्ध यहाँका मुक्ति सेनाको साहसिक कार्यको स्मरण गर्दै प्रत्येक बर्षको जेठ ११ गतेका दिन यहाँ क्रान्ति दिवस मनाउने गरिन्छ ।
तत्कालिन राणा शासक फौजको आक्रमण बिरुद्ध मुक्ति सेनाको प्रतिकारबाट भगाउन सफल भएको स्मरण गर्दै बर्षेनी जेठ ११ गतेका दिन यहाँ क्रान्ति दिवस मनाउने गरिएको हो ।
जहानिया राणा शासनका बिरुद्ध र प्रजातान्त्रिक शासन ब्यवस्था स्थापनार्थ नेपाली कांग्रेसले खडा गरेको मुक्ति सेनालाई परास्त गर्ने उदेश्यले २००७ जेठ ११ गते राणा फौजले बहाकोटमा आक्रमण गरेको थियो । त्यसबेला मुक्ति सेनाको कमाण्डर होबिर आले थिए । आलेको नेतृत्वमा क्रान्ति सुरु भएको थियो । उनका पछिपछि स्थानीय महिलाहरु गौकुमारी मल्ल लगायतका धेरै महिलाहरु पनि क्रान्तिमा होमिएका थिए ।
होबिर आलेको अभियानलाई यहाँका स्थानीयबासी दुतप्रसाद गुरुङ, थानबहादुर सिंह, गौकुमारी मल्ल, कोठे सार्की लगायत दर्जनौं ब्यक्तिको समूह प्रतिकारमा उत्रेर विपक्षी फौजलाई भगाउन सफल भएको स्मरण गर्दै सोही दिन पारेर आइतवार सांस्कृतिक कार्यक्रम सहित भलिवल प्रतियोगिताको आयोजना गरिएको छ ।
भन्ज्याङ्मा निर्मित आलेको अर्दकदको मूर्तिमा माल्यार्पण गर्दै नगर प्रमुख तुलसीराम रेग्मीले होविर आलेको साहस, योगदान, बलिदानलाई राष्ट्रले स्मरण गर्नुपर्ने बताउनुभयो । आलेले प्रजातन्त्र र लोकतन्त्रका कुशल संगठक रहेको जनाउदै रैतीबाट नागरिक बनाउने अभियानमा आलेको भूमिका महत्वपूर्ण रहेको बताउनुभयो ।
प्रजातन्त्रका निम्ति आफनै जीउ धन नै अर्पण गर्ने होविर आले लगायतका वीर विरंगानाको योगदानलाई कसैले पनि बिर्सन नहुनेमा जोड दिनुभयो । आले बहाकोटको मात्र नभई राष्ट्रकै योद्धा एवं क्रान्तिकारिक नेता भएको बताउनुभयो ।
नेपाली नागरिकका स्वतन्त्रताका लागि राणा शासन बिरुद्ध पहिलो पटक आवाज उठाएका र आलेको स्मरण गर्दै होबिर आलेको नेतृृत्वमा अघि बढेको क्रान्तिले सफलता पाएकोमा जोड दिनुभयो ।
यसैगरी, आलेका छोरा भुतपूर्व सैनिक संघ केन्द्रीय सहअध्यक्ष क्या. मोतीप्रसाद आले, नेपाली कांग्रेस महासमिती सदस्य सीता गोदार, नगर सभापति सुरजकुमार अधिकारी, नु वहाकोट बिधालय ब्यबस्थापन समितीका अध्यक्ष भक्तबहादुर मल्ल, कांग्रेस वडासचिव गौतम सिंह ठकुरी, नेकपा माओवादी केन््रद्रका धनबहादुर सेन, वडा सदस्य रवि सेन, समाजसेवी धिरज खाँण, शिक्षक सुनिता आले लगायतले होविर आले र बहाकोटको क्रान्तिका बारेमा जानकारी गराउदै आलेको योगदानको चर्चा परिचर्चा गर्नुभयो ।
वडा न ८ का अध्यक्ष इम बहादुर सेनको अध्यक्षतामा सम्पन्न कार्यक्रममा सदस्य टोलमाय थापाले स्वागत र वडा सचिव परशुराम अधिकारीले संचालन गर्नुभएको थियो ।
मुक्ति मोर्चाका कमाण्डरको स्मरण गर्दै आक्रमण स्थल बहाकोटको भन्ज्याङ्मा होविर आलेको अर्धकदको मूर्ति राखिएको छ ।
