स्याङ्जा, २८ असोज । वालिङ नगरपालिकाका बाख्रापालक कृषकहरु खोर निर्माणमा अनुदान पाएपछि उत्साहित भएका छन् । बाख्रापालक कृषकको क्षमता बृद्धि र उत्पादन बृद्धि गर्न नगरपालिकाले खोर निर्माणमा अनुदानको व्यवस्था गरेपछि उनीहरु उत्साहित भएका हुन् ।
वालिङ नगरपालिकामा सञ्चालित “वालिङ कृषि विकास परियोजना” अन्तर्गत बाख्राको खोर निर्माण गरिएको छ । साना किसान तथा महिलालाई उद्यशीलतामा जोड्ने उद्देश्यले सुरु भएको कार्यक्रम मार्फत कृषकले अनुदानमा खोर निर्माण गरेका हुन् । कृषकले खोर निर्माणमा नगद ३० हजार अर्थात कुल लागतको ५० प्रतिशत अनुदान पाएको परियोजनाले जनाएको छ ।
नगरपालिकाका वडा नं.–१, २, ३, ४, ५, ६ र ७ का कृषकहरुले अनुदानमा बाख्राको खोर निर्माण गरेका छन् । वडा नं. ६ का स्थानीय बाख्रापालक कृषक सीता कामीले अनुदानमा खोर निर्माण गर्न पाएपछि आफूहरु उत्साहित भएको बताईन । अनुदानमा आधुनिक तथा व्यवस्थित खोर निर्माणपछि बाख्रा पालनप्रति स्थानीय कृषकको आकर्षण समेत बढेको छ ।
बाख्रापालनको लागि राम्रो वातावरण भएको वालिङ नगरपालिकामा ९० वटा आधुनिक खोर निर्माण गरिएको नगरपालिकाका पशुसेवा शाखा प्रमुख डाक्टर रोशन बस्यालले जानकारी दिए । आधुनिक खोर निर्माणले बाख्रापालक कृषकलाई सहज भएको उनले बताए । सुविधा सम्पन्न खोरमा बाख्रापालन गर्दा रोगको सङ्क्रमण कम हुनुको साथै उत्पादन र उत्पादकत्व बृद्धि हुने डाक्टर बस्यालले सुनाउनुभयो ।
ख्रापालनलाई ब्यवसायिक बनाउँदै उत्पादन बढाउने उद्देश्यले आधुनिक खोर निर्माण गरिएको वालिङ नगरपालिकाका प्रमुख कृष्ण खाँणको भनाई छ । निर्वाहमूखी कृषि प्रणालीमा परिवर्तन ल्याउने पालिकाको योजना अनुरुप काम भईरहेको खाँणले बताए । परियोजना अन्र्तगत झण्डै एक हजार घरपरिवारले बाख्रापालन गर्दै आएका छन् ।
पहिलो चरणमा बनेको खोर देखेपछि कृषकहरु आधुनिक खोर निर्माणतर्फ आकर्षित भएको वडा नं.–५ का वडा अध्यक्ष छवी आलेले बताए । ‘खोर निर्माण गर्नुपर्छ भन्दा पहिले चासो नदेखाएका कृषकहरु पछिल्लो समय लौन न हाम्रो पनि खोर बनाउनु प¥यो भन्दै आएका छन् ।’ खासगरी बाख्रापालनमा महिलाहरु आकर्षित भएको उहाले सुनाउनुभयो ।
कृषकको माग र आवश्यकताका आधारमा आधुनिक खोर निर्माण गरिएको परियोजनाले जनाएको छ । वालिङ नगरपालिका र हेफर प्रोजेक्ट नेपालको आर्थिक र प्राविधिक सहयोग तथा स्थानीय दियालो संस्थाको व्यवस्थापनमा सञ्चलिन परियोजनाले साना किसान र महिलाहरुलाई आयआर्जन र उद्यमशीलतामा जोड्ने काम गर्दै आएको छ ।
३ वर्षसम्म संचालनमा रहने परियोजनामा ५२ कृषक समूहमा झण्डै १४ सय घरपरिवार आबद्ध भएको परियोजाले जनाएको छ । महिला बाहुल्य रहेका समूह मार्फत स्थानीयले बाख्रा, गाईभैसी कुखुरापालन र तरकारी खेती गर्दै आएका छन् । परियोजनामा आबद्ध कृषकलाई उत्पादनमा आधारित अनुदान समेत दिने तयारी गरेको नगरपालिकाले जनाएको छ ।