स्याङ्जा ८ असार । पुतलीबजार नगरपालिका ७ ठूलाडिही स्थित जनता माध्यमिक बिद्यालयमा खुमा अर्याल फाउण्डेशनले प्राथमिक उपचार सम्बन्धी प्रशिक्षण र स्वास्थ्य सामाग्री हस्तान्तरण गरेको छ ।
खुमा अर्याल फाउन्डेसन स्याङ्जा ,रोटरी क्लब अफ नक्साल शक्ती र रोट्र्याक क्लब अफ नक्सालको सहयोगमा जनता माविमा प्रशिक्षण सहित प्राथमिक उपचारका सामाग्री प्रदान गरेको हो ।
आइतवार बिद्यालयमा आयोजित कार्यक्रमको उदघाटन गर्दै नगर उपप्रमुख देवी अर्यालले प्राथमिक उपचार सम्बन्धी जानकारी लिन पाउनु अत्यन्तै सुखद रहेको बताउनुभयो । यस्ता तालिमले आफु मात्र नभई सिंगो घर, समाज, बिद्यालय र अन्यत्र जुनसुकै स्थानमा पनि उपयोगमा ल्याउन सकिने र अमूल्य जीवन बचाउनमा सहयोग पुग्ने बताउनुभयो । जुनसुकै समय र स्थानमा पनि हुन सक्ने अस्वस्थताका बेला गरिने पहिलो उपचार राम्रोसंग गर्न सकियो भने पुनर्जिवन पाउन सकिने उहाले भन्नुभयो ।
कार्यक्रममा जिल्ला समन्वय समिति सदस्य नेमबहादुर राना, वडाअध्यक्ष कृष्णबहादुर आले, पत्रकार भवानी अधिकारी, अभियान सूचना केन्द्रका अध्यक्ष बन्दना लम्साल, शिक्षक अभिभावक संघका अध्यक्ष अशोक रेग्मी, खुमा अर्याल फाउण्डेशनका अध्यक्ष लेखनाथ शर्मा लगायतले हरेक बिद्यालयले यस्ता कार्यक्रम गर्नुपर्नेमा जोड दिनुभयो ।
जनता माध्यमिक बिद्यालय ब्यवस्थापन समितिका अध्यक्ष कपिलमणी रेग्मीको अध्यक्षतामा सम्पन्न कार्यक्रममा प्रधानाध्यापक खुमबहादुर रानाले स्वागत र सहायक प्रधानाध्यापक रविलाल रेग्मीले संचालन गर्नुभएको थियो । सोही कार्यक्रममा डा. अनुप लम्सालले प्राथमिक उपचार सम्बन्धी उपचार बिधिका बारेमा जानकारी गराउनुभएको थियो ।
यसैगरी, फाउण्डेशनले प्राथमिक उपचार कक्षका लागि आवश्यक एक शैया र औषधी समेत उपलब्ध गराएको छ । नगरउपप्रमुख देवी अर्याल र फाउण्डेशनका अध्यक्ष लेखनाथ शर्माले बिद्यालयका अध्यक्ष कपिलमणी रेग्मी र प्रधानाध्यापक खुमबहादुर रानालाई ति सामाग्री हस्तान्तरण गर्नुभएको थियो ।
