स्याङ्जा २७ बैशाख । पुतलीबजार नगरपालिका वडा नं ५ पौवेगौडे निवासी खोपबहादुर गोदारले आफनो ८४ औं बार्षिकोत्सव बृद्धाश्रममा गएर मनाउनु भएको छ ।
तडकभडक गरेर मनाउनु भन्दा बृद्धबृद्धालाई सकेको सहयोग र एक छाक खाना खुवाएर मनाउछु भन्ने लाग्यो अनि बृद्धाश्रममा आएर मनाए गोदारले भन्नुभयो ।
दुई छोरा, दुई छोरी र उनका नाति नातिना र आफना भाइखलक सहित बस चढेर गल्याङ् नगरपालिका १ मा अवस्थित कालीगण्डकी नदी किनारमा रहेका रामनदीधाम आश्रम पुगेर उहाले बृद्धाबृद्धसंगै ८४ औं पुजालाई त्यही पुरा गर्नुभयो ।
हिन्दुहरुका पवित्र तिर्थस्थल कालीगण्डकी नदीमा नुवाएर, बात्ती पुजन गर्नुभयो । धाम वरपरका मन्दिरमा दर्शन पुजापछि आश्रित नागरिकलाई टिका सहित फलफूल र जनही २÷२ हजार नगद दिनुभयो । बिहानको खाना खुवाउनुभयो । आश्रमलाई ६ हजार नगद उपलब्ध गराउनुभयो ।
आश्रममा बस्दै आएका ९० बर्षिया पूर्णकुमारी मल्ललाई टिका लगाईदिदै नगद र फलफूल दिनुभयो । अनि आर्शिवाद लिनुभयो । टाउकोमा हात राख्दै उहाले भन्नुभयो, ‘मनले आटेताकेका सबैकुरा पुरा होउन। सेवाभाव रहिरहोस्। हामी सबैको आर्शिवाद छ। खुशी लागेको छ।’
लामो जीवनयात्रा सुखदुखमा बित्यो। अहिले चौरासीको पुजा पारिवारिक जमघटसंगै छोटोमिठो तरिकाले मनाउन पाँए आत्मासन्तुिष्ट मिलेको गोदारले बताउनुभयो ।
मेरा काका बुवाले आफनो ८४ औं पुजा फजुल खर्च नगरिकन सामाजिक सेवामा खर्चिने जनाएपछि उहाँकै ईच्छा बमोजिम नै गरिएको भतिज ईन्द्रबहादुर गोदारको भनाई छ।
प्रायजसोले आ आफना घरमा ठूलाठूला पुजा तथा भब्य तरिकाले मनाइरहेका बेलो बेसाहारा र विपन्न परिवारका सदस्यसंगै बसेर मनाउन आएका गोदारलाई आश्रमका ब्यवस्थापक सुनिल श्रेष्ठले धन्यवाद दिदै सेवा नै धर्म भएको बताउनुभयो । उहाले थप्नुभयोे, ‘तपाईहरु जस्तैको सहयोग र सदभावले आश्रम चलेको छ ।’
शिवपार्वती बृद्धाआश्रममा स्याङ्जा लगायतका बिभिन्न जिल्लाकागरि अहिले २५ जना बृद्धबृद्धा बस्दै आएका छन् । स्याङ्जा र पाल्पा जिल्ला अर्थात गण्डकी र लुम्बिनी प्रदेशको सिमानामा रहेको कालीगण्डकी नदी किनारमा अवस्थित रामनदीधाम पवित्र धार्मिक तिर्थस्थल हो ।
सिद्धार्थ राजमार्गको छेवैमा अवस्थित यहाँ बर्षेनी हजारौं तिर्थयात्री आउने र बस्ने गर्दछन। भारतीय र नेपालीहरुको धुइरो नै लाग्ने गर्दछ ।