स्याङ्जा ३० असोज । कालीगण्डकी गाउँपालिकामा खसी बोका बिक्रीबाट एक करोड ३६ लाख रुपैंया आम्दानी गरेको छ ।
खसी तथा बोकाको पकेट क्षेत्र कार्यक्रम अन्र्तगत रही दशैंको अवधिमा सञ्चालन भएको गाउँपालिकाका विभिन्न वडाबाट दशैं पर्वलाई लक्षित गरी उत्पादन भएका खसी बोकाबाट एक करोड ३६ लाख ६२ हजार भित्रिएको हो ।
गाउँपालिकाका पशु विकास शाखाका प्रमुख राजेश पाण्डेयका अनुसार दशैं पर्वलाई लक्षित गरी गत भदौदेखि दशैंको अवधिमा पालिकाका विभिन्न गाउँहरुबाट ७ सय ८६ वटा खसी बोकाहरु बिक्री भएका थिए ।बिक्री भएकामध्ये २ सय ८० वटा स्थानीय बजारमा र बाँकी ५ सय ६ वटा खसी बोका पालिका बाहिर निर्यात भएका उहाँले जानकारी दिनुभयो ।
“करिब ३० केजी तौलका खसी बोका लाई प्रतिकिलो ९ सय रुपैंयाका दरले १५ हजार १८० किलो मासु बिक्री गर्दा १ करोड ३६ लाख ६२ हजार रुपंया आम्दानी भएको होे ।” सात वटा वडा रहेको कालीगण्डकी गाउँपालिकामा विशेष गरी वडा नं १ र २ मा खसी बोका धेरै उत्पादन हुने गरेको छ । बाह«ै महिना खसी बोकाको व्यावसाय हुने भए ता पनि दशैंको अवधिमा भने वडा नं १ को कारीकोट चण्डीभञ्ज्याङबाट २ सय ६० र वडा नं २ को घुरडाँडा र लसर्घावेसीबाट २ सय १० वटा खसी बोका बिक्री भएको उहाँको भनाई छ ।
बाख्रा पकेट कार्यक्रम, प्रधानमन्त्री कृषि आधुनिकीकरण परियोजना लगायतका कार्यक्रमहरु यहाँ सञ्चालन भएकाले पनि गाउँका प्रत्येक जसो घरमा १० देखि ३० वटा बाख्रा छन् । विशेष गरी स्थानीय खरी जात र केही उन्नत जातका बाख्राहरु यहाँ पाल्ने गरिएको छ । ७० भन्दा धेरै घरधुरी रहेको यस गाउँका प्रायःजसो घरधुरीले बाख्रापालनबाट राम्रो आम्दानी गर्दै आएका छन् ।
पहिला पशुपालक कृषक र व्यापारीबीच खरिद बिक्रीमा मोलमलाई हुने गथ्र्यो तर अहिले गाउँपालिकाले किलोका आधारमा मुल्य निर्धारण गरिदिएकाले सहज भएको पनि किसानको भनाई छ । गाउँपालिकाले पालिकाभित्र उत्पादन भएका खसी बोकाको बजारीकरणको ग्यारेन्टी गरिदिएको गाउँपालिकाका अध्यक्ष खिमबहादुर थापाले बताउनुभयो ।
गाउँपालिकाले २४ किलोदेखि ६१ केजीसम्म र सोभन्दा धेरै किलो भएका जिउँदो खसी बोकाको प्रतिकेजीका दरमा मुल्य निर्धारण गरिदिएको छ । न्यूनतम प्रति किलो ३ सय ८० देखि अधिकतम ५ सय ८० सम्म मुल्य कायम गरिदिएकाले सोही मुल्यका आधारमा कृषकले बिक्री गर्दै आएका छन् । कृषकले उत्पादन गरेको खसी बोका खरिदकालागि व्यापारीहरु गाउँमै आउने गरेका छन् । जसका कारण यहाँ खसी बोका पालक किसानलाई बजार खोज्दै अन्यत्र जानु परेको छैंन ।