स्याङ्जा ७ असोज । कालीगण्डकी ज्ञानविज्ञान प्रतिष्ठान उत्तरवाहिनीमा विभिन्न विद्यालयका शिक्षकहरुबीच छलफल तथा अन्तरक्रिया गरिएको छ ।
यही असोज २१ देखि कार्तिक १९ गतेसम्म हुने कालीगण्डकी महामेला दामोदर महोत्सव–२०८२ को मिति नजिकिदै गर्दा विभिन्न विद्यालयका शिक्षकहरुसंग छलफल तथा अन्तरक्रिया गरिएको हो ।
कार्यक्रममा स्याङ्जाको गल्याङ नगरपालिका र कालीगण्डकी गाउँपालिका तथा रम्भा गाउँपालिका पाल्पाको विभिन्न विद्यालयका शिक्षकहरुको सहभागिता रहेको थियो ।
कालीगण्डकी महामेला दामोदर महोत्सव–२०८२ का सन्दर्भमा गल्याङ नगर शिक्षा समिति सदस्य एवम् सार्वजनिक नमूना माविका प्रधानाध्यापक चुडामणी पाण्डेले कार्यक्रमको जानकारी गराउनुभयो ।
कार्यक्रमको जानकारीसँगै सहभागीहरुले आ–आफ्नो तर्फबाट कालीगण्डकी महामेला दामोदर महोत्सव सफल पार्न पूर्ण सहयोग रहने प्रतिवद्धता जनाउनु भएको छ । साथै उहाहरुले प्रतिष्ठानको नजिक रहेका विद्यालयहरुको सहयोग बेसी हुनुपर्ने र अरु विद्यालयहरुले पनि समय मिलाएर साथदिने बताउनुभयो ।
अहिले मानवतायुक्त, संस्कारयुक्त शिक्षा र अनुशासन आजको आवश्यकता भएकाले महामेलाबाट विद्यार्थीहरुले यस्तो ज्ञान लिन पाउने अपेक्षा गरिएको उहाहरुको भनाई थियो ।महामेलामा बढि भन्दा बढि विद्यार्थीलाई स्वयम्सेवककारुपमा सहभागी गराएर अवसरको सदुपयोग गर्नुपर्नेमा शिक्षकहरुको जोड छ ।
महामेलाका लागि प्रचार प्रसारलाई तिव्रता दिनुपर्ने र यसका लागि विद्यालयको वेभसाइट एवम् सामाजिक सञ्जालको अधिकतम प्रयोग गरेर आँफूहरु लाग्नेसमेत उहाहरुले जनाउनु भएको छ ।
कार्यक्रमका अवसरमा कालीगण्डकी महामेला दामोदर महोत्सव मूल आयोजक समिति संयोजक चैतन्यकृष्णले उत्तरवाहिनी क्षेत्रको धार्मिक विकासको दीघकालीन सोंचसहित आयोजना गरिएको महामेला सफल पार्न हामी सबै आ– आफ्नो ठाउँबाट लाग्नुपर्नेमा जोड दिनुभयो । उहाले महामेलामा सहभागी भएर नेपाल र भारतका विश्वविख्यात सन्त एवम् गुरुहरुद्वारा आशीवर्चन सहितको आध्यात्मिक लाभलिने अवसरलाई सम्पूर्ण महानुभावहरुलाई आग्रह गर्नुभएको छ ।
हामी सबैको साझा कार्यक्रम भएको र महाकुम्भ सरहको मेला भएकाले देश विदेशबाट पनि धेरैजनाको उपस्थिति रहनेमा आँफू विश्वस्त रहेको उहाको भनाई छ । चैतन्य कृष्णका अनुसार शास्त्रमा उत्तरतर्फ फर्केको नदिलाई सर्वतीर्थ भनिन्छ । कालीगण्डकी उत्तर भएर बगेकी हुनाले यिनलाई यहाँ उत्तरवाहिनी भनिएको हो । जहाँ ब्रह्ममयी गङ्गा नदी उत्तरवाहिनी मूर्ती भएर विद्यमान हुनुहुन्छ, त्यहाँ उहाँलाई दर्शन गर्दा, स्नान गर्दा र प्रणाम गर्दा समस्त पापहरुको नाश हुन्छ । त्यसैले संस्कृतिको अध्ययन गर्ने सबैले पटक पटक दर्शन गर्नुपर्ने उनको भनाई छ ।
