स्याङ्जा २३ भदौ । जेन–जि आन्दोलनमा देखाइएको दमन र आक्रमणप्रति अर्जुनचौपारी गाउँपालिकाले विरोध जनाएकोे छ ।
गाउँपालिका अध्यक्ष प्रकाश तिवारीले विज्ञप्ति मार्फत लोकतान्त्रिक मूल्य र मान्यतालाई कुण्ठित गर्ने प्रयास अस्वीकार्य भएको उल्लेख गर्नुभएको छ । अध्यक्ष तिवारीद्धारा हस्ताक्षरित प्रेस विज्ञप्तिमा जेन जि आन्दोलनमाथि भएको दमन र आक्रामणप्रति गहिरो चिन्ता, आक्रोस र दुख प्रकट गरेकोे छ । लोकतान्त्रिक मुल्य र मान्यताका आधारमा जेनजि पुस्ता र नागरिकहरुले आफ्ना आवाजहरु शान्तिपुर्ण रुपमा उठाउने अधिकारलाई दबाउने जुनसुकै प्रयास स्वीकार्य नभएको उल्लेख छ ।
आन्दोलनमा सहभागि नागरिकहरुमाथि गरिएको बल प्रयोग, दमन र अवरोधले राज्यप्रतिको विश्वासलाई गम्भीर रुपमा खल्बल्याएको भनिएको छ । साथै उक्त घटनामा गम्भीर घाईते भएकाप्रति सहानुभुति प्रकट गर्दै सीघ्र स्वास्थ्य लाभको कामना गर्दै आन्दोलनमा अमुल्य ज्यान गुमाउने युवाप्रति श्रद्धान्जली व्यक्त गरिएको छ । आन्दोलनमा घाईते भएकाहरुको उपचार तथा मृतकका परिवारको राहतका लागी पालिकाले स्थापना गरेको सामाजिक उत्तरदायित्व कोषबाट ५ लाख सहयोग प्रदान गर्ने र अन्य आवश्यक परेमा थप सहयोग गर्ने प्रतिवद्धता व्यक्त गरिएको छ ।
साथै पालिकाले सरकारप्रति ५ बुँदे माग राखेको छ । आन्दोलनका क्रममा भएका सबै घटनाको तत्काल, निष्पक्ष र स्वतन्त्र छानविन गर्न, दोषीहरुलाई कानुनी दायरामा ल्याई पिडितलाई न्याय दिन, घाईतेहरुको उपचार र पुर्नस्थापनाको जिम्मा राज्यले लिन र नागरिकको शान्तिपुर्ण आन्दोलनमाथि बल प्रयोग अन्त्य गर्न माग गरिएको छ ।
यसैगरी, वालिङमा पनि जेन जि समुहले दिउसो प्रर्दशन गरेका थिए भने स्याङ्जा सदरमुकाम स्थित सहित चोकमा मैनबत्ती बालेका थिए । १८ देखि २८ वर्ष उमेर समूहका युवाहरुको समुह सामाजिक संजाल बन्द, भ्रष्ट्राचार र बेतिथिका विरुद्धमा युवाहरु सडकमा उत्रिएर बिरोध गरेका हुन ।