स्याङ्जा ३० साउन । प्रतिनिधिसभा सदस्य राजु थापाले जनताका प्रतिनिधि जनतााप्रति जवाफदेही हुनुपर्ने बताउनु भएको छ ।
स्याङ्जा जिल्ला समन्वय समितिद्धारा स्याङ्जा सदरमुकाममा आयोजित ११ औं जिल्ला सभाको उदघाटनगर्दै थापाले जनताको नजिकको सरकारले उनीहरुका जीवनस्तर कसरी माथि उठाउन सकिन्छ भनेर नयाँनयाँ कारगर कार्यनीति मार्फत अहोरात्र चिन्तनगर्नु पर्ने बताउनुभएको छ ।
थापाका अनुसार, ‘यतिबेला जनतामा निराशा छ, राज्यका निकायसंग साधन स्रोत सीमित छ, प्राथमिकतामा योजना छनौट गर्नु पर्ने वाध्यता छ, तै पनि बहुसंख्यक जनताको भावनालाई संबोधनगर्न सकिनेगरी बिकास योजना तर्जुमा गर्नु जनताका प्रतिनिधिको प्रमुख दायित्वहो ।’
जिल्ला समन्वय समितिले संघीयताको भावना अनुरुप समन्वयकारी भूमिका निर्वाह गरेको र आगामी दिनमा साधन, स्रोत र अधिकार सम्पन्न समितिको परिकल्पना गरिएको पनि थापाले सुझाउनुभयो । बर्तमान सरकार संबिधान संशोधनको प्रमुख मुद्धामा केन्द्रित रहेर गठन भएको हुँदा अब हुने संशोधनमा जनताका भावना मुखरित हुनेछन् । जनप्रतिनिधिमूलक संस्थाप्रति विश्वास जगाउन सके मात्र संसदीय लोकतान्त्रिक शासन ब्यवस्था दिगो र स्थायी हुनेमा उहाले जोड दिनुभयो ।
राजनीतिक अस्थिरताको जोखिमबाट बचाउन, मितब्ययी र जनमैत्री जनप्रतिनिधिमूलक संस्थाले जनताले प्रत्यक्ष अनुभूतिगर्न सक्ने खालको काम गरेर देखाउन समेत आग्रह गर्नुभयो ।
सोही कार्यक्रममा प्रमुख जिल्ला अधिकारी ईश्वरीप्रसाद अर्यालले संबिधानको मर्म अनुरुपजिल्ला समन्वय समितिलाई समन्वयकारी भूमिकाप्रदान गरेको र तदनुकूलको जिम्मेवारी पूरा गर्न सफलभएको बताउनुभयो ।
जिल्ला समन्वय समितिका प्रमुख श्रीप्रसाद जीटीको अध्यक्षतामा सम्पन्न कार्यक्रममा उपप्रमुख खडगराज सुुवेदीले स्वागत र जिल्ला समन्वयअधिकारी नवराज बरालले संचालन गर्नुभएको थियो ।
स्याङ्जास्थित ११ वटै पालिकाका प्रमुख, अध्यक्ष ,उपप्रमुख, उपाध्यक्ष, जिल्ला समन्वय समितिका पदाधिकारी एवं सदस्यहरु सम्मिलित सभाले चालु आर्थिक बर्षका लागि नीति तथा कार्यक्रम सहित १ करोड ६१ लाख ६२ हजारको बजेट सहितको विस्तृत कार्ययोजना स्वीकृत गरेको छ ।