स्याङ्जा, १३ मंसिर । अर्जुनचौपारी गाउँपालिका–१, अर्जुनचौपारी बजारमा २०५९ सालदेखि संचालनमा आएको ग्रामिण स्वावलम्बन साना किसान कृषि सहकारी संस्थाको २३ औं वार्षिक साधारण सभा सम्पन्न भएको छ । सहकारीको साधारण सभा अर्जुनचौपारी खेलमैदानमा सम्पन्न भएको हो ।
साधारण सभालाई सम्बोधन गर्दै साना किसान विकास बैंकका संचालक सुखदेब न्यौपानले पछिल्लो समय सहकारी क्षेत्र बदनाम हुँदै गएको समयमा ग्रामिण स्वावलम्बन सहकारीले अर्जुनचौपारीका स्थानीय शेयर सदस्यलाई गरेको सेवा प्रसंशा योग्य रहेको बताउनुभयो ।
साना किसान कृषि सहकारीले पशुपालन, कृषि उत्पादन र र्निजीवन बीमाका क्षेत्रमा कृषकसँग सहकार्य गर्दै आएको संचालक न्यौपानेले सुनाउनुभयो । सहकारीले शेयर सदस्यको आर्थिक वृद्धिलाई ध्यानमा राख्दै जोखिम बहनलाई प्राथमिकता दिएर अगाडी बढेको उहाले बताउनुभयो ।
सहकारीको वार्षिक साधारण सभामा बोल्दै सहकारीका संस्थापक अध्यक्ष तथा अर्जुनचौपारी गाउँपालिकाका पूर्व अध्यक्ष दीर्घनारायण अर्याल, गाउँपालिकाका पूर्व उपाध्यक्ष चिनमाया गुरुङ्, साना किसान विकास बैंक पोखराका प्रबन्धक पदमराज रेग्मीले सानो सानो बचतबाट आर्थिक उन्नतीमा लाग्न सकिने भएकाले बचत गर्ने बानीको विकास गर्न आग्रह गर्नुभयो ।
साधारण सभामा अर्जुनचौपारीको पञ्चकन्य माध्यमिक विद्यालयका प्रधानाध्यापक विष्णुप्रसाद तिवारी, नेपाल पत्रकार महासंघ स्याङ्जाका पूर्वअध्यक्ष प्रकाश डोटेल, सहकारी शेयर सदस्य तथा समाजसेवी यामबहादुर गुरुङ् र सहकारीका पशु बीमा उप–समितिका संयोजक दुर्गाबहादुर गुरुङ्ले सहकारीका सदस्यहरुलाई उत्पादनमा केन्द्रित हुँदै आर्थिक विकासमा लाग्न जोड दिनुभयो ।
दुई करोड शेयर पुँजी रहेको बाह्यि ऋण १५ करोड र १५ करोड निक्षेप सकंलन गरेको सहकारीले २५ करोड कर्जा लगानी गरेको छ । सहकारीले गएको आर्थिक वर्ष २०८१÷०८२ मा झण्डै ८० लाख मुनाफा आर्जन गर्न सफल भएको सार्वजनिक प्रतिवेदनमा उल्लेख गरिएको छ । त्यस अवसरमा सहकारीका केन्द्रहरुमध्ये उत्कृष्ट केन्द्रलाई सम्मान गरिएको थियो ।
अर्जुनचौपारी गाउँपालिका कार्यक्षेत्र रहेको सहकारीमा झण्डै दुई हजार पाँचसय शेयर सदस्य रहेका छन् । आर्थिक वर्ष २०७४÷०७५ बाट पशु बीमा कार्यक्रम संचालन गरेको सहकारीले गएको वर्षसम्म एक करोड ५१ लाखको बीमा कोष बनाउन सफल भएको छ । १३ हजार पशुको बीमा गराएको सहकारीले ५१० पशुको क्षति भएवापत पशुधनिलाई झण्डै २४ लाख रुपैयाँ भुक्तानी गरेको सहकारीका प्रबन्धक शालिग्राम काप्लेले जानकारी दिनृभयो ।
सहकारीले महिला शेयर सदस्यलाई बढिमा २ सन्तान जन्माउँदा प्रतिबच्चा दुई हजार सुत्केरी स्याहार खर्च उपलब्ध गराउँदै आएको छ । सहकारीले मौसमी बेमौसमी तरकारी, कफी, सुन्तला, पशुपालक कृषक शेयर सदस्यको उत्पादनलाई बजारीकरण गर्दै आएको छ । सहकारीले २० भन्दा बढि बाख्रापालन गर्ने कृषकलाई ५ हजार नगद अनुदान दिदै आएको सहकारीले जनाएको छ ।
सहकारीका अध्यक्ष बोध नारायण रेग्मीको अध्यक्षतामा भएको २३ औं वार्षिक साधारण सभा कार्यक्रमको संचालन सहकारीका प्रबन्धक शालिग्राम काफ्लेले गर्नुभएको थियो भने सहकारीका उपाध्यक्ष प्रेमबहादुर थापाले स्वागत मन्तव्य व्यक्त गर्नुभएको थियो । त्यस अवसरमा सहकारीका झण्डै एक हजार पाँच सय शेयर सदस्य सहभागिता थियो ।