स्याङ्जा २० असोज । आँधीखोला गाउँपालिका ६ फापरथुम स्थित ’आनन्दआश्रम ज्ञान केन्द्र’को तेस्रो साधारणसभासंगै साहित्यिक गोष्ठी सम्पन्न भएको छ ।
प्रगतिशील साहित्यकार चक्रबहादुर पराजुली प्रमुख अतिथ्यतामा सम्पन्न भएको हो । साहित्यिक गोष्ठीमा कवि पोषराज पौडेल र कवि चिन्तु गिरीलाई “आनन्दआश्रम प्रज्ञा सम्मान“ स्वरूप खादा, दोसल्ला र प्रमाणपत्रद्वारा सम्मान गरिएको छ ।
सम्मानित कविहरूको साहित्यिक यात्राका बारेमा संस्थाका संस्थापक संरक्षक त्रिलोचन ढकालद्वारा विस्तृत रूपमा जानकारी गराउनु भएको थियो ।
कार्यक्रममा वरिष्ठ कवि पोषराज पौडेल र प्रख्यात कवि चिन्तु गिरीले शुभकामना मन्तब्य सहित सबैलाई धन्यवाद र छन्दबद्ध कविता प्रस्तुत गर्नुभएको थियो । त्रिभुवन विश्वविद्यालयका सहप्राध्यापक हिमलाल पुरी, देवी सापकोटा, ई.सुदर्शन शर्मा, विद्यार्थी शिखा सुनार र रिदम ढकालले पनि कविता वाचन गर्नुभयो ।
यसैगरी, संस्थाको तेस्रो साधारणसभा एवं अधिबेशनले टिकाराम ढकाल (काका) को अध्यक्षतामा कार्यसमिति निर्वाचित गरेको छ । समितिको उपाध्यक्षमा दिप्तिनारायण शर्मा , सचिवमा दोलराज ढकाल, उपसचिवमा खेमनारायण लामिछाने र कोषाध्यक्षमा नन्दबहादुर जिटी निर्वाचित हुनु भएको छ ।
यसैगरी, सदस्यहरुमा इन्द्रमणि ढकाल, खगिसरा जिटी, गृहलक्ष्मी ढकाल डा. ऋषिराम ढकाल, देवी सापकोटा, मानबहादुर जिटी, शारदा शर्मा, शेरबहादुर शाही, हिमलाल पुरी र हिमालयजंग बानिया चयन हुनुभयो ।
निर्वाचित समितिलाई निर्वाचन समितिका संयोजक लोकनाथ शर्माले बधाई दिदी कार्तिक ३ गते महाकवि लक्ष्मीप्रसाद देवकोटाको जन्मजयन्ती मनाउन माध्यमिक विद्यालयहरूका विद्यार्थीहरूका बीचमा कविता प्रतियोगिता हुने जानकारी गराउनुभयो ।
संस्थाका अध्यक्ष ईन्जिनियर ओम शर्माको अध्यक्षतामा सञ्चालित कार्यक्रममा उपाध्यक्ष दिप्तिनारायण शर्माले स्वागत र सचिव दोलराज ढकालले संचालन गर्नुभएको थियो ।
सभामा अघिल्लो कार्यकालमा भए गरेका कामका विवरण र आगामी कार्ययोजना सहित आय–व्ययको प्रतिवेदन पनि सचिव दोलराज ढकालले प्रस्तुत गरेका थिए । ती प्रतिवेदनहरू पारित भएपछि आगामी दुई वर्षको निम्ति कार्यसमिति सर्वसम्मत रुपमा निर्वाचित गरिएको हो ।