पर्वत १९ साउन । पर्वत जिल्लाको पैयूँ गाउँपालिका वडा नं. ५ ले सामाजिक सुरक्षा भत्ता नविकरणलाई सहज, प्रभावकारी र सबैको पहुँचमा ल्याउने उद्देश्यले घर–घरमै पुग्ने अभियान सुरु गरेको छ ।
सामाजिक सुरक्षा भत्ता नविकरणका लागि वडा कार्यालयसम्म आउदा हुने कठिनाईलाई मध्येनजर गर्दै वडाअध्यक्ष निर्भिक नारायण भुर्तेल बायोमेट्रिक मेशिन बोकेर घरघरमा पुग्नु भएको हो ।
वडामा रहेका ज्येष्ठ नागरिक, एकल महिला, अपाङ्गता भएका व्यक्ति, विधवा र अन्य लक्षित समूहका लाभग्राहीहरूले वडा कार्यालयसम्म आउनु नपरोस् भन्ने सोच सहित यो अभियान सुरु गरिएको उहाले बताउनुभयो ।
वडा अध्यक्ष भुर्तेलका अनुसार, “हामी वृद्धवृद्धाहरूलाई लाइनमा उभिनु नपरोस् भन्ने उद्देश्यले टोलटोलमै पुगेर नविकरण सुरु गरेका छौं। सामाजिक सुरक्षाका कार्यक्रमहरू अझ पहुँचयोग्य बनाउने हाम्रो जिम्मेवारी हो।”
यो अभियानको सुरुवात बानीडाँडा गुरुङ गाउँबाट गरिएको हो। वडाले घरघरमै पुगेर लाभग्राहीहरूको विवरण अद्यावधिक गर्दै नविकरणको प्रक्रिया अगाडि बढाइरहेको छ।
वडाले जानकारी दिएको अनुसार, राष्ट्रिय परिचयपत्र नभएका लाभग्राहीहरूको भत्ता नविकरण गर्न नसकिने भएकाले परिचयपत्र नभएका आमाबुबाहरूलाई यथाशीघ्र परिचयपत्र बनाउन अनुरोध गरेको छ।