स्याङ्जा १६ भदौ । गण्डकी र लुम्बिनी प्रदेशबिच विकासमा सहकार्य र सहलगानी गर्ने उद्देश्यका साथ सोमबार स्याङ्जाको गल्याङ् नगरपालिका १ मालुंगामा बसेको दुई सरकारबीच समान्वात्मक बैठकले ९ बुँदे निर्णयमा हस्ताक्षर हस्ताक्षर गर्दै ती निर्णयहरु सार्वजनिक गर्नुभएको छ ।
स्याङ्जा र पाल्पाको संगमस्थल एवं धार्मिक क्षेत्र कालीगण्डकी उत्तरबाहिनीमा भएको प्रदेश सरकारका मुख्यमन्त्री द्धय सहित अर्थ, पर्यटन, भौतिक, बन मन्त्री, प्रदेशसभा सदस्य, सचिव सहित सरोकारवालाबीच भएको छलफल सहित प्रस्तुतीले ९ बटा बुदाँमा टेकेर आउदा दिनमा काम गर्ने निर्णय भएको हो ।
गण्डकी प्रदेशका मुख्यमन्त्री सुरेन्द्रराज पाण्डे र गण्डकी प्रदेशका मुख्यमन्त्री चेतनारायण आचार्यले हस्ताक्षर गर्दै प्रतिबद्धता जनाउनुभयो ।
सरकारका बार्षिक नीति तथा कार्यक्रम र बजेटमा सम्बोधन भएका साझा निर्णयको विवरण तयार गरि मातहतका निकायलाई निर्देशन दिने, दुबै प्रदेशका धार्मिक पर्यटन क्षेत्र ‘दामोदरकुण्ड कृष्णागण्डकी उत्तरवाहिनी लुम्बिनी मुक्तिमार्ग’ विकासका अवधारणा पत्र तयार पार्ने, अन्तर प्रदेश साझेदारीमा सञ्चालन हुने भनिएका आयोजना तथा कार्यक्रमलाई बिषयगत मन्त्रालयलाई निर्देशन दिने, कालीगण्डकी तटीय क्षेत्रको समुन्नतीका आधार पहिचान गर्न पुष मसान्तभित्र योजना आयोगमा पेश गर्ने निर्णय भएका हुन ।
यसैगरी, यही असोज २१ देखि कात्तिक १९ सम्म उत्तरवाहिनी क्षेत्रमा संचालन हुने कात्तिक महास्नान तथा दामोदर धर्मोत्सव भब्यरुपमा सम्पन्न गर्न दुबै प्रदेश सरकारबाट सहजीकरण एवं सहयोग गर्ने, विकास ब्यवस्थापन तथा सेवा प्रवाहमा एक अर्का प्रदेशका सिकाई तथा असल अभ्यासको अनुशरण गर्ने, दुबै प्रदेशका तीर्थस्थल, पर्यटकीय स्थल जोड्ने पदमार्गको पहिचान तथा निर्माणका लागि विस्तृत आयोजना प्रतिवेदन संयुक्तरुपमा तयार पार्ने लगायतका बुदाँहरु समेटिएका छन् ।
यसअघि माघ ३० गते पाल्पाको रानी महलमा बसेको पहिलो बैठकले गरेका २१ निर्णयका बारेमा पनि समिक्षा भएको छ। यसैगरी, तेस्रो बैठक बाग्लुङ्को ढोरपाटनमा गर्ने समेत जानकारी गराइएको छ । सोही कार्यक्रममा गण्डकी मुख्यमन्त्री पाण्डे र लुम्बिनीका मुख्यमन्त्री आचार्यले गण्डकी र लुम्बिनी प्रदेशलाई जोड्ने सिद्धार्थ राजमार्ग र कालीगण्डकी नदी दुबै प्रदेशमा सम्मृद्धिका आधार भएको जनाउदै धार्मिक, पर्यटकीय विकास गर्दै अघि बढ्ने प्रतिबद्धता जनाउनुभयो ।
कार्यक्रममा अर्थमन्त्री डा. टकराज गुरुङ, भौतिक पूर्वाधार मन्त्री भुमेश्वर ढकाल, पर्यटन मन्त्री प्रचण्डदेव न्यौपाने, सभासद बिरबहादुर राना र भोजराज अर्याल, लुम्बिनी प्रदेशका प्रमुख सचिव बाबुराम अधिकारी, गण्डकीका निमित्त प्रमुख सचिव गणेश घिमिरे, गल्याङ् नगरप्रमुख गुरुप्रसाद भट्टराई, सहसचिव धु्रव गिरी लगायतले दुई प्रदेशबीचको समन्वय र सहकार्यले दुवै प्रदेशको उन्नती र समृद्धिमा सहयोग पुग्नेमा जोड दिनुभयो ।
यसैबीच, सोही कार्यक्रममा पूर्वसांसद शंकरप्रसाद पाण्डेले कालीगण्डकी डाइभर्सन आयोजना अगाडि नबढाउन आग्रह गर्दै दुवै मुख्यमन्त्रीलाई कालीगण्डकी प्रभावित क्षेत्रका नागरिकका तर्फबाट ज्ञापनपत्र बुझाउनुभएको थियो ।
