स्याङजा ३ जेठ । गल्याङ् नगरपालिकाले विपन्न परिवारका १ सय ८१ जना बालबालिकालाई छात्रबृत्ती प्रदान गरेको छ ।
आर्थिक अभावका कारण उच्च शिक्षा अध्ययनबाट बंचित हुन नपरोस् भन्ने उदेश्यले नगरपालिकाले १२ लाख १७ हजार ८ सय रुपैंया छात्रबृत्ती स्वरुप उपलब्ध गराएको नगरप्रमुख गुरुप्रसाद भट्टराईले जानकारी दिनुभयो ।
नगरपालिका अन्र्तगतका गल्याङ बहुमुखी क्याम्पस र मालुंगा बहुमुखी क्याम्पसमा अध्ययनरत जेहेन्दार विपन्न तथा गरिब छात्रछात्रालाई मासिक शुल्क वापत एक वर्षको एकमुष्ट जनही १० हजार ८ सय रुपैया प्रदान गरिएको प्रमुख भट्टराईको भनाई छ ।
यसैगरी, कक्षा ११ र १२ मा अध्ययनरत अति गरिब, विपन्न तथा जेहेन्दार विद्यार्थीलाई जनही ३ हजार छ सय रुपैंया उपलब्ध गराइएको छ । क्याम्पसमा अध्ययरत कुल बिद्यार्थीमध्ये कक्षा ११ र १२ मा अध्ययरत १० प्रतिशत र कक्षा ११ र १२ मा अध्ययनरत विद्यार्थीमध्ये २० प्रतिशतले पूर्णछात्रवृत्ति स्वरुपको सो रकम उपलब्ध गराइएको हो ।
यसवर्ष क्याम्पसमा अध्ययनरत ८० जनालाई निःशुल्क, अति विपन्न २ जना र कक्षा ११ र १२ मा अध्ययनरत ९९ जनालाई छात्रवृत्ति प्रदान गरेको उपप्रमुख हेमा न्यौपानेले जानकारी दिनुभयो ।
अतिविपन्न, गरिब तथा जेहेन्दार विद्यार्थीका लागि सम्बन्धित क्याम्पस तथा विद्यालयले छात्रवृत्तिका लागि आवेदन माग गर्ने र प्राप्त आवेदनलाई पालिकाको कार्यविधि बमोजिम शिफारिस गर्नेगर्दछ ।
कार्यबिधिमा पूर्णछात्रवृत्ति प्राप्त गरेको विद्यार्थी उत्तीर्ण भएमात्रै अघिल्लो कक्षामा अध्ययन गर्न पुनः छात्रवृत्ति पाउनेछन्। तर, अनुत्तीर्ण विद्यार्थीले भने पुनःउक्त सुविधा पाउने नपाउने उल्लेख छ ।
शैक्षिक क्षेत्रको गुणस्तरीतामा बृद्धि हुनुका साथै शिक्षाको सहज पहुँचबाट कोही पनि वंचित हुन नदिने नगरपालिकाको अभियान रहेको प्रमुख भट्टराईको भनाई छ ।