स्याङ्जा ८ असोज । वालिङ नगरपालिकास्थित गह्रौँसुर मन्दिरमा बडादसैं व्यवस्थापनको जिम्मेवारी वालिङ नगरपालिकाले लिने भएको छ । ब्यवस्थापन समिति चयन भैनसकेको जनाउदै यसपटक वडादशैंको अवसरमा मन्दिरको ब्यवस्थापनको जिम्मेवारी वालिङ नगरपालिकाले लिने भएको हो ।
धार्मिक, सांस्कृतिक तथा पर्यटकीय महत्व बोकेको यस गह्रौंसुर कालिका मन्दिरमा दशैं पर्वलाई लक्षितगर्दै पूजा–अर्चना, मेला, र मन्दिर परिसरमा सञ्चालन हुने व्यापारिक गतिविधिमा पनि नगरपालिकाको प्रत्यक्ष निगरानी रहनेगरि जिम्मेवारी रहनेगरि नगरपालिकाले निर्णय गरेको छ ।
नगर उपप्रमुख कविता तिवारीको अध्यक्षतामा सम्पन्न बैठकले मन्दिरको अभिभावकत्व ग्रहण गर्ने निर्णय गर्दै व्यवस्थित र पारदर्शी व्यवस्थापन सुनिश्चित गर्ने प्रतिबद्धता जनाएको छ । नगरपालिकाले घटस्थापनादेखि फूलपातीसम्म मन्दिर परिसरमा खाजा–नास्ता तथा पूजा सामग्री बिक्री गर्न चाहने व्यापारीकालागि बढाबढ प्रणाली मार्फत अनुमति दिने भएको छ ।
सामाजिक विकास समितिका संयोजक युगमाया पंगेनीका अनुसार खाजा–नास्ताको लागिन्यूनतम ७७ हजार रुपैयाँ र पूजा सामग्री स्टलकालागि २७ हजार ५ सय रुपैयाँ तोकिएको छ । विगतकावर्ष भन्दा यस वर्ष सहुलियत दररेट कायम गरेर न्यूनतम मूल्य तोकिएको पंगेनीले जानकारी दिनुभयो ।
विसं २०८० सालको वडा दसैंमा होटेल वापत ८० हजार र पूजा सामाग्रीको व्यवसायगर्न चाहने व्यवसायीलाई २५ हजार तोकिएको थियो । यस्तै, गतवर्ष होटेललाई ९० हजार र पूजा सामाग्रीको पसलगर्न चाहने व्यवसायीलाई न्यूनतम ४० हजार तोकिएको थियो ।
यस वर्ष भने नगरपालिकाले मूल्य निर्धारण गर्दा माग, विगतको अनुभव र पारदर्शी व्यवस्थापनलाई ध्यानमा राखेको जनाएको छ ।
गर्हौसुर मन्दिरमा दशैंको समयमा ठूलो संख्यामा भक्तजन आउने गर्दछन् ।
विशेष गरी घटस्थापनादेखि फूलपातीसम्म मन्दिरमा विशेष भीडलाग्ने गर्छ । भक्तजनलाई सहज र व्यवस्थित सेवा उपलब्ध गराउन यसपटक नगरपालिकाले नै व्यवस्थापनको जिम्मालिएको हो । नगरपालिकाले सरसफाइ, सुरक्षाको व्यवस्था, मेलामा आउने भक्तजनकालागि शुद्ध खानेपानी, बिजुली र मेलाको समयमा आवश्यक पर्ने आधारभूत सुविधामा समेत ध्यानदिने तयारी गरेको छ ।
वालिङ–८ र गल्याङ नगरपालिका १० को सङ्गमस्थलमा अवस्थित गह्रौँसुर मन्दिरमा बडादसैँको घटस्थापनादेखि कोजाग्रात पूर्णिमाको दिनसम्ममा भक्तालुजनको भीडलाग्ने गर्दछ । तत्कालिन चौविसे राजादशरथ खाँणले वि.सं.१५५२ मा गह्रौँकालिकाको स्थापना गरेको मानिन्छ । ऐतिहासिक एवं पुरातात्विक महत्वको यस मन्दिर ५५० वर्ष पुरानो मानिन्छ । गह्रौँकालिका जागृत देवी भएकाले पनि यहाँ भाकलगर्दा दर्शनार्थी तथाभक्तजनको मनोकांक्षा पूरा हुने जनविश्वास छ । गह्रौँसुर समुद्र सतहदेखि झण्डै १ हजार ६ सय मिटरको उचाइमा छ ।
यहाँबाट स्याङ्जासंगै पाल्पा, तनहुँ, कास्की, नवलपरासी, पर्वत लगायतका जिल्ला सहजै अवलोकन गर्न सकिन्छ । धार्मिक, सांस्कृतिक एवम् पर्यटकीय महत्व रहेको गह्रौँसुरबाट उत्तरतर्फको मनमोहक हिमशृङ्खलाले जो कोहीलाई पनि आनन्दित पार्दछ ।
धार्मिक एवं पर्यटकीय दृष्टिले प्रचुर सम्भावनाबोकेको यस मन्दिरमा भौतिक पूर्वाधार, सुविधा सम्पन्न अतिथि गृह, सडकको स्तरोन्नति, खानेपानी लगायतको राम्रो व्यवस्था छ । मन्दिरसम्म पुग्नका लागि सहज सडक छ ।
वालिङ बजारबाट झण्डै ८ किलोमिटरको पक्की र केही कच्ची ग्रामीण सडकहुँदै मन्दिरमापुग्न सकिन्छ । विशेष गरी बडादसैँ र चैते दसैँमा यहाँ हजारौँको संख्यामा मानिसहरु आउने गर्दछन ।